ཕྱི་ལོ་ ༢༠༠༩ ལོ་ནས་ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནང་ཁང་གིས་དྷ་རམ་ས་ལར་གནས་སྡོད་སྐྱབས་བཅོལ་བོད་མི་གཙོས་ས་གནས་རྒྱ་གར་མི་མང་མི་ཉུང་བ་ཞིག་ལ་རིན་མེད་མིག་བརྟག་དཔྱད་དང་འབྲེལ། རིན་མེད་མིག་ཤེལ་གསར་བཟོའི་ལས་འཆར་ཞིག་ལག་བསྟར་བྱས་ཤིང་། ཐོག་མར་ས་གནས་མིག་གི་སྨན་པ་ལྷའི་ཡིག་ཚང་ནང་ཆེད་དུ་གདན་འདྲེན་ཞུས་ཏེ། མི་མང་ལ་མིག་བརྟག་དཔྱད་བྱས་པས་མ་ཚད། ས་གནས་སྨན་ཁང་གི་སྨན་པས་བརྟག་དཔྱད་ཞིབ་ཚགས་བྱས་པ་བརྒྱུད། ཁྱོན་མི་གྲངས་ ༥༧༧ ཙམ་ལ་རིན་མེད་མིག་བརྟག་དཔྱད་དང་མི་གྲངས་ ༤༤༥ ལ་རིན་མེད་ཐོག་ནས་མིག་ཤེལ་བཟོས་ཡོད། ལོ་ལྟར་ཁྱོན་མི་གྲངས་ ༡༠༠ ཡས་མས་ཤིག་གི་མིག་བརྟག་དཔྱད་དང་མིག་ཤེལ་གསར་བཟོ་བྱེད་ཀྱི་ཡོད།

ཕྱི་ལོ་ ༢༠༡༡ ནས་སོ་གཙང་བཟོ་དང་བཟོ་བཅོས་ཀྱི་ལས་གཞི་འདི་འགོ་འཛུགས་ཀྱིས། སོ་གཙང་བཟོའི་ལས་འཆར་འོག ཁྱོན་མི་གྲངས་ ༥༤༠ ཙམ་གྱི་སོ་བརྟག་དཔྱད་དང་གཙང་བཟོ་སོགས་བྱས་ཡོད། སོ་བརྟག་དཔྱད་ཀྱི་ལས་འཆར་དེས་སོ་གཙང་བཟོ་དང་བཟོ་བཅོས་སོགས་ཀྱི་མི་མང་པོ་ཞིག་ལ་ཕན་ཐོགས་ཆེན་པོ་ཡོང་གི་ཡོད་པ་དགོངས་ཚུལ་ཤོད་མཁན་བྱུང་ལ། དྷ་ས་ཁུལ་དུ་གནས་སྡོད་སྐྱབས་བཅོལ་བོད་མི་དང་ས་གནས་རྒྱ་གར་གྱི་སྤྱི་ཚོགས་ནང་། རིན་མེད་སོ་བརྟག་དཔྱད་དང་གསར་བཟོ་ནི་དཀའ་ངལ་ཡོད་པའི་མི་མང་ལ་ཁ་ཡོད་ལག་ཡོད་ཀྱིས་ཕན་ཐོགས་ཡོད་ལ། སོ་གཙང་བཟོ་དང་བཟོ་བཅོས་ལས་གཞི་འདིས་སོའི་འཕྲོད་བསྟེན་དང་བདེ་ཐང་ལ་ཕན་ཐོགས་ངེས་ཅན་བྱུང་ཡོད།

ཚོགས་པས་གཉན་ནད་རེག་དུག་སྐོར་གོ་རྟོགས་ལས་འགུལ་འདྲ་མིན་སྤེལ་གྱི་ཡོད་པ་ལྟར། རེག་དུག་ན་ཚའི་སྐོར་མཁྱེན་རྟོགས་སླད་བོད་ཨིན་ཧིན་གསུམ་ནང་མི་མང་ལ་འགྲེམས་སྤེལ་དང་། གཉན་ནད་རེག་དུག་ནི་བོད་པའི་སྤྱི་ཚོགས་ནང་དར་ཁྱབ་འགྲོ་བཞིན་པའི་ཧ་ཅང་ཉེན་ཁ་ཆེ་བའི་གནད་དོན་ཞིག་ཡིན། འགོས་ཁྱབ་བཀག་འགོག་སོགས་ལས་འགུལ་སྣ་ཚོགས་སྤེལ་གྱི་ཡོད།

༢༠༡༦ ཟླ་ ༡༠ ཚེས་ ༢༣ ནས་ཚེས་ ༢༥ བར་ཉིན་གསུམ་རིང་ལྷ་ཞི་བའི་ཚལ་ཚོགས་ཁང་དུ་ཤར་ནུབ་འཕྲད་པ་ཞེས་པའི་དྲན་ཤེས་སྨན་གྱི་ཚོགས་ཆེན་ཚོགས་ཤིང་། ཚོགས་འདུ་དེ་ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་དང་། བདེ་ལེགས་སྨན་ཁང་། ནིའུ་ཨོར་ལན་སིའི་ཨོ་ཤ་ནར་སྨན་ཁང་ཁག ལུ་ཛི་ཡ་ན་མི་སི་སི་པིའི་འཕྲོད་བསྟེན་སྒྲིག་འཛུགས། ལུ་ཛི་ཡ་ན་ཧི་མཱ་ལ་ཡའི་ཚོགས་པ་བཅས་ཐུན་མོང་གིས་གོ་སྒྲིག་གནང་བར་མ་ཟད། བོད་ཀྱི་སྨན་རྩིས་ཁང་གི་སྨན་པ་དང་། ས་གནས་རྒྱ་གར་སྨན་པ་སོགས་གདན་ཞུས་ཀྱིས་གོང་གསལ་ཚོགས་སྡེ་དང་སྨན་ཁང་ཁག་ནས་སྨན་པ་གྲངས་ཉི་ཤུ་ལྷག་འདུ་འཛོམས་བྱུང་ཡོད་པ་རེད།

གསར་འགྱུར་རྒྱུད་ལམ་ནི་མི་རྣམས་ལ་རྒྱལ་སྤྱི་དང་རྒྱལ་ནང་གི་འགྱུར་འགྲོས་དང་གནས་ཚུལ་ལེགས་ཉེས་ཇི་བྱུང་དུས་ཐོག་ཏུ་མཁོ་སྤྲོད་བྱེད་པའི་རྒྱུད་ལམ་ཞིག་ཡིན་པས། བོད་པའི་གནས་བབས་ལ་མཚོན་ན་སྐད་ཡིག་འདྲ་མིན་ཐོག་གསར་འགྱུར་རྒྱུད་ལམ་དགོས་མཁོ་ཧ་ཅང་ཆེན་པོ་ཡོད། ཡིན་ནའང་བཙན་བྱོལ་སྤྱི་ཚོགས་ནང་ཕྱི་རྒྱལ་སྐད་ཡིག་དང་ལྷག་པར་ཨིན་ཡིག་ཐོག་བོད་དོན་གནས་ཚུལ་ཁག་རྒྱུན་མཐུད་ནས་ཟླ་རེར་ལྟར་ཆགས་པར་སྐྲུན་གྱིས་རིན་མེད་འགྲེམས་སྤེལ་དང་། ཁྱབ་ཆེན་པོ་ཡོད་པ་ང་ཚོས་པར་སྐྲུན་བྱེད་བཞིན་པའི་འབྲེལ་གཏུག་དུས་དེབ་ཙམ་ལས་མེད་ཅིང་། ང་ཚོས་གཙོ་གཉེར་གྱིས་དཔར་སྐྲུན་བྱེད་བཞིན་པའི་འབྲེལ་གཏུག་དུས་དེབ་ (Contact Magazine) འདི་ཕྱི་ལོ་ ༡༩༩༧ ཙམ་ལ་ཨ་རི་བའི་ནང་མི་ཞིག་དང་བོད་པའི་གཞོན་སྐྱེས་འགའ་ཤས་ཀྱིས་འགོ་འཛུགས་བྱས་ཡོད་པ་དང་།

ཕྱི་ལོ་ ༢༠༠༩ ལོར་ཚོགས་པས་ཁོར་ཡུག་སྲུང་སྐྱོབ་ཀྱི་གོ་རྟོགས་ལས་འགུལ་གྱི་ལས་འཆར་འགོ་འཛུགས་བྱས་ཤིང་། འཛམ་གླིང་ནང་རང་བྱུང་ཁོར་ཡུག་གི་གནས་སྟངས་དེ་ཉིན་རེ་བཞིན་ཇེ་ཞན་ཇེ་སྡུག་ཏུ་ཕྱིན་ནས་སའི་གོ་ལར་འཕྲད་བཞིན་པའི་ཛ་དྲག་གི་དཀའ་ངལ་དུ་གྱུར་ཡོད་ལ། ཁོར་ཡུག་སྲུང་སྐྱོབ་ཀྱི་ལས་དོན་དེ་རྒྱལ་སྤྱིའི་ཁྱོན་ལ་ཆེས་གལ་གནད་ཆེ་བའི་དཀའ་ཚེགས་ཅན་གྱི་ལས་དོན་ཞིག་ལ་བརྩི་བཞིན་ཡོད་པ་དང༌། རང་བྱུང་ཁོར་ཡུག་ལ་གནོད་འཚེ་དང་གཏོར་བཤིག་བཏང་ན་སླར་གསོ་རྩ་བ་ནས་བྱེད་མི་ཐུབ་ཅིང་། ཡང་ན་སླར་གསོ་བྱེད་པར་དུས་ཡུན་ལོ་ངོ་བཅུ་ཕྲག་འགའ་ཤས་འགོར་གྱི་ཡོད། མཉམ་འབྲེལ་རྒྱལ་ཚོགས་ཀྱི་ཁོར་ཡུག་དང་འཕེལ་རྒྱས་འཆར་འགོད་ལྷན་ཚོགས་གཙོས་པའི་འཛམ་གླིང་རྒྱལ་ཁབ་ཁག་དང༌། འབྲེལ་ཡོད་ཚོགས་སྡེ། དེ་བཞིན་འགན་ཁུར་ལྡན་པའི་སྐྱེ་འགྲོ་མང་པོས་འོས་འགན་ཆེན་པོ་བླངས་ཏེ་སྲུང་སྐྱོབ་ཞུ་སྒོའི་ལས་དོན་དང༌། རང་བྱུང་ཁོར་ཡུག་ལ་བདག་གཅེས་ལེགས་པོ་དང་དོ་མཉམ་ལྡན་པ་ཞིག་ཡོང་ཕྱིར་བརྒྱུད་ལམ་འདྲ་མིན་བརྒྱུད་དེ་གོ་རྟོགས་ལས་འགུལ་སྣ་མང་གོ་སྒྲིག་གིས་འགྲོ་གྲོན་ཆེས་མང་པོ་གཏོང་བཞིན་ཡོད།

ཕྱི་ལོ་ ༢༠༠༨ ལོར་ང་ཚོར་ཨ་རིར་ཡོད་པའི་མཉམ་ལས་ཚོགས་པ་ཨོམ་པ་ཀར་ཤི་ནས་ཨིན་ཡིག་གི་བྱིས་པའི་སྒྲུང་དེབ་དང་། དཔེ་དེབ། ཚིག་མཛོད་སོགས་སུམ་ཁྲི་ཙམ་ཞལ་འདེབས་བྱུང་བས། དེ་དག་ཚང་མ་བོད་ཁྱིམ་སློབ་གྲྭ་ཁག་གཙོས་བོད་པའི་སློབ་གྲྭ་ཁག་ ༢༠ ཙམ་དང་། དཔེ་མཛོད། ཤེས་ཡོན་སྡེ་ཚན། དེ་བཞིན་རུ་ཊར་སྤྱི་ཚོགས་ཞབས་ཞུ་ཚོགས་པ་བརྒྱུད་ས་གནས་རྒྱ་གར་སློབ་གྲྭ་ ༡༣ སོགས་ལ་ཞལ་འདེབས་སྤྲད་པ་དང་། ད་དུང་ལོ་ལྟར་དཔེ་དེབ་རིགས་ཞབས་འདེབས་བྱུང་བ་ཁག་འབྲེལ་ཡོད་སློབ་གྲྭ་དང་དཔེ་མཛོད་སོགས་ལ་སྤྲོད་མུས་ཡིན། ཕྱི་ལོ་ ༢༠༡༥ ལོར་འཛམ་གླིང་སྒྲུང་གཏམ་ཉིན་མོ་བོད་ཨིན་གཉིས་ཀྱི་སྒྲུང་དེབ་ ༡༠༠༠ རིན་མེད་འགྲེམས་སྤེལ་བྱས་པ་དང་། ང་ཚོ་རང་གིས་པར་སྐྲུན་བྱས་པའི་སློབ་དཔོན་ཟམ་གདོང་རིན་པོ་ཆེ་མཆོག་གི་གསུང་རྩོམ་དང་མངོན་བསྟོད་གླེགས་བམ་གཉིས་ཀ་ནམ་རྒྱུན་དུ་རིན་མེད་འགྲེམས་སྤེལ་བྱེད་བཞིན་ཡོད་པ་རེད།

ལྷའི་དྭང་བླངས་པ་དང་ཡུལ་སྐོར་བའི་ས་ནས་གྱོན་གོས་གསར་པ་དང་རྙིང་པ་སོགས་ཞལ་འདེབས་བསྡུ་བའི་ལས་གཞི་འདི་ཚོགས་པ་གསར་འཛུགས་སྐབས་ནས་འགོ་འཛུགས་བྱས་ཡོད་པ་དང་། གྱོན་གོས་དེ་དག་དགོས་མཁོ་ཅན་དང་མཐུན་རྐྱེན་ཞན་པའི་གྲོང་གསེབ་ཏུ་མི་སྒེར་དང་། སློབ་གྲྭ་ཁག་གཙོས་ས་གནས་ཀྱི་སྐྱབས་བཅོལ་བོད་མི་དང་། རྒྱ་གར་ཡུལ་མི། དེ་བཞིན་དྷ་སའི་ས་གནས་རུ་ཊར་སྤྱི་ཚོགས་ཞབས་ཞུ་ཚོགས་པ་དང་། རྒྱ་གྲམ་དམར་པོ་ཚོགས་པ་བརྒྱུད་ལོ་ལྟར་རིན་མེད་གྱོན་གོས་བགོ་འགྲེམ་ཀྱི་བྱེད་སྒོ་སྤེལ་གྱི་ཡོད། ད་བར་གྱོན་གོས་གསར་རྙིང་གྲངས་ ༣༨༠༤༧ ཙམ་རིན་མེད་བགོ་འགྲེམས་བྱས་ཡོད་ཅིང་། དེའི་ནང་ཕྲུ་གུའི་རྩེད་ཆས་དང་། ཉལ་ཆས། ལྷམ། ཕོ་མོའི་དབྱར་དགུན་གྱི་གྱོན་གོས་སོགས་ཡོད། དེ་དག་ནི་གཏོང་ཕོད་ཅན་གྱི་མི་སྒེར་བ་དང་། ཚོགས་པ་སོགས་ཀྱིས་ཞལ་འདེབས་གནང་བ་ཤ་སྟག་ཡིན། ཤེས་རྟོགས་བྱུང་བ་ལྟར་ན་དམིགས་བསལ་དགོས་མཁོ་ཡོད་པ་དང་དཀའ་ངལ་ཅན་རྣམས་ལ་ཕན་ཐོགས་གང་ལེགས་ཡོང་གི་ཡོད་པ་རེད་འདུག

ཉེ་བའི་ལོ་འགའ་ཤས་ནང་བཞུགས་སྒར་དྷ་རམ་ས་ལར་ཡོད་པའི་ “བྱམས་པ་གླིང་རྒས་གསོ་ཁང་” ལའང་རོགས་རམ་མི་ཉུང་བ་ཞིག་བྱེད་ཐུབ་པ་བྱུང་ཡོད། རྒས་གསོ་ཁང་འདིའི་ནང་ཡོད་པའི་རྒས་འཁོགས་དེ་དག་ནི་དམག་མི་ཟུར་པ་དང་། གཉེན་ཉེ་བུ་རྒྱུད་སོགས་མེད་མཁན་དེ་འདྲ་རེད། འོན་ཀྱང་རྒས་གསོ་ཁང་འདི་དབུས་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་འཛིན་སྐྱོང་འོག་ཡོད་ཅིང་། ཕྱི་ནང་གི་མཐུན་རྐྱེན་སོགས་གང་ཅིའི་ཐད་ཡག་པོ་དང་འཐུས་སྒོ་ཚང་པོ་ཡོད་ནའང་། དབུས་བོད་མིའི་སྒྲིག་འཛུགས་ཀྱི་ལས་དོན་དང་ལས་གཞི་སོགས་གཞི་རྒྱ་ཆེན་པོ་དང་ལྷག་པར་ལས་དོན་ཁག་གཞུང་གི་ཁྲིམས་སྒྲིག་དང་བསྟུན་དགོས་པས་ཕྲལ་དུ་ལག་བསྟར་མ་ཐུབ་པ་དེ་འདྲ་ཡོང་གི་ཡོད། དེར་བརྟེན་ཚོགས་པས་སྦྱིན་བདག་བཙལ་འཚོལ་གྱིས་གཤམ་གསལ་ལས་འཆར་དེ་རིགས་རོགས་རམ་དང་ལག་བསྟར་བྱས་པ་ཞིག་རེད།