བོད་པའི་ན་གཞོན་ཚོར་ཐེངས་གསུམ་པའི་ཕུར་མཉེ་ལས་རིམ་སྦྱོང་བརྡར།
ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་གི་ལས་གཞི་སྣ་མང་རྒྱུན་སྐྱོང་བྱེད་བཞིན་པ་ལས་ཟླ་གསུམ་བོད་ཀྱི་སྲོལ་རྒྱུན་ཕུར་མཉེའི་སྦྱོང་བརྡར་ཐེངས་གསུམ་པའི་ལས་རིམ་དེ་བཞིན་༢༠༡༩ ཟླ་༩ ཚེས་༡༦ ཉིན་སློབ་ཕྲུག་༩ འཛུལ་ཞུགས་བྱས་ཡོད་ཅིང་།
ཐོག་མར་ཟླ་བ་གཅིག་གི་རིང་ཕུར་མཉེའི་རྒྱུན་རིམ་སློབ་ཁྲིད་ཀྱི་རྣམ་གཞག་དང་བོད་ཀྱི་སྲོལ་རྒྱུན་ཕུར་མཉེའི་འཛིན་གྲྭ་དང་། དེའི་རྗེས་ཟླ་བ་གཉིས་ཀྱི་རིང་སློབ་ཕྲུག་རྣམས་ཆ་བགོས་ཀྱིས་ཉེར་ཁོར་དུ་ཕུར་མཉེ་ཁང་སོ་སོའི་ལས་ཀའི་དངོས་གཞིའི་སྦྱོང་བརྡར་ཞུགས་ཀྱི་ཡོད། སྦྱོང་བརྡར་དེ་ནི་ལྷ་ལག་ཤེས་སྦྱོང་བརྡར་ལས་གཞིའི་ཆ་ཤས་ཤིག་ཡིན་པ་དང་། ལས་གཞིའི་དམིགས་ཡུལ་ནི་བོད་པའི་གཞོན་སྐྱེས་རྣམས་ལ་མ་འོངས་པའི་མི་ཚེའི་མདུན་ལམ་ཁྲོད་རང་ཉིད་ཀྱི་ལག་ཤེས་ལ་བརྟེན་ནས་རང་ཉིད་འཚོ་བའི་མཐུན་རྐྱེན་སོགས་ལ་དཀའ་ངལ་མི་འབྱུང་བ་དང་སླད་གཞོན་སྐྱེས་རྣམས་བོད་དང་ཕྱི་རྒྱལ་ཡུལ་གྲུ་འདྲ་མིན་ནང་སླེབས་པའི་སྐབས་ད་ལྟའི་ལག་ཤེས་དེར་བརྟེན་ལས་ཀའི་གོ་སྐབས་ཐོབ་རྒྱུ་དང་རང་ཁ་རང་གསོ་ཐུབ་པའི་དམིགས་རྟེན་ཡང་ཡིན། 
མ་ཟད་ལས་འཆར་དེའི་ནང་དཔལ་འབྱོར་འདུ་འགོད་དང་ཨིན་ཇི་རྨང་གཞིའི་སོགས་ཀྱི་སློབ་ཚན་ཡང་ཡོད།
ལག་ཤེས་སྦྱོང་བརྡར་ལས་རིམ་གཞན་ཁ་ལག་བཟོ་སྟངས་སམ་མ་བྱན་ལག་ཤེས་སྦྱོང་བརྡར་ལས་རིམ་དེ་བཞིན་ལྷ་ཞི་བའི་ཚལ་གྱི་ཐབ་ཚང་དུ་འགྲོ་མུས་ཡོད་པ་བཅས།