སོའི་སྨན་བཅོས་ལས་གཞི་ལེགས་གྲུབ་ཟིན་པ།
ལྷ་སྤྱི་ཚོགས་ཞབས་ཞུ་དང་ཤེས་ཡོན་ཁང་ནས་འཕྲོད་བསྟེན་དང་འབྲེལ་བའི་ལས་གཞི་སྣ་མང་སྤེལ་མུས་ལྟར། ཕྱི་ལོ་ ༢༠༡༨ ཟླ་ ༡༠ ཚེས་ ༡༦ ཉིན་རྒྱ་གར་ལྷོ་ཕྱོགས་ཀར་ན་ཀྲ་ཀ་མངའ་སྡེ་ཁུངས་སུ་ཡོད་པའི་མཡེ་སོར་རྫོང་ནང་གི་སོའི་སྨན་ཁང་གི་མཐོ་རིམ་སློབ་གྲྭ་(J.S.S. Dental college and hospital) ནང་སློབ་ཐོན་ཟིན་པའི་རང་གཞུང་བདེ་ལེགས་སྨན་ཁང་གི་སོའི་སྨན་པ་བསྟན་འཛིན་ཆོས་སྒྲོན་ལགས་གདན་ཞུས་ཀྱིས་ལྷ་སྤྱི་ཐབ་ཁང་དུ་ཞལ་ལག་མཆོད་མཁན་སྐྱ་སེར་དབྱེར་མེད་ཀྱི་མི་གྲངས་༢༢ དང་།
ལྷའི་སྐད་ཡིག་འཛིན་གྲྭའི་སློབ་ཕྲུག་གྲངས་༣༤ བཅས་ཚོགས་ཁག་སོ་སོའི་ནང་། རྒྱུན་གཏན་ནས་རང་ཉིད་ཀྱི་སོ་བདག་གཅེས་གནང་སྟངས་ཇི་ལྟ་གལ་ཆེ་ཚུལ་དང་། སོ་ཁྲུས་དང་སོ་སྨན་བེད་སྤྱོད་བྱེད་སྟངས་གཙོས་པའི་སོའི་སྐོར་གྱི་ཤེས་བྱ་སྣ་མང་དང་འབྲེལ་བའི་བཀའ་སློབ་ལམ་སྟོན་དང་དྲི་བ་དྲིས་ལན་ཡང་གནང་ཡོད་པ་རེད། ང་ཚོ་ཚོགས་པའི་ངོས་ནས་སོ་ཁྲུས་དང་སོ་སྨན་རིན་མེད་ཀྱིས་འགྲེམ་སྤེལ་སོགས་ཀྱི་མཐུན་རྐྱེན་སྦྱར་ཡོད་པ་བཅས།
