ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་ནས་སྤྲོ་བ་དང་བཅས་ཏེ་གསལ་བསྒྲགས་བྱ་རྒྱུར། ཐེངས་འདིར་ཕྱི་ལོ་༢༠༡༨ ནས་ ༢༠༢༠བར་ལོ་གསུམ་གྱི་སྨན་ཞབས་སློབ་སྦྱོང་བྱེད་བཞིན་པའི་བུད་མེད་གསུམ་ལ་སློབ་ཡོན་གྱི་མཐུན་འགྱུར་རོགས་རམ་བྱེད་ཐུབ་པ་བྱུང་ཡོད། བུད་མེད་དེ་དག་ནི་སློབ་སྦྱོང་ལ་འབད་བརྩོན་དང་སྙིང་རུས་ལྡན་ཞིང་། འཛིན་རིམ་བཅུ་གཉིས་ཀྱི་བརྒྱ་ཆ་ལེགས་ཤོས་གྲས་སུ་སླེབས་ཡོད་ནའང་ཁྱིམ་ཚང་གི་མཐུན་རྐྱེན་སོགས་གང་ཅི་ཐད་དངོས་ཡོད་གནས་ཚུལ་གྱི་དཀའ་ངལ་ཡོད་པར་བརྟེན།

ང་ཚོའི་ཚོགས་པ་དང་ཨ་རིའི་ཐུ་ལན་གཙུག་ལག་སློབ་གྲྭའི་རིག་གཞུང་བརྗེ་རེས་ཀྱི་སྤྱི་ཚོགས་ཞབས་ཞུ་སློབ་ཕྲུག་ཚོ་ཁག་ (Tulane School of Social Work student group) དང་མཉམ་འབྲེལ་གྱིས་རོགས་དངུལ་བསྡུ་རུབ་ཞུས་ཏེ། ཕྱི་ལོ་ ༢༠༡༡ ལོར་དྷ་ས་རུ་ང་ཚོའི་རིག་གཞུང་བརྗེ་རེས་ཀྱི་ལས་གཞིའི་ནང་མཉམ་ཞུགས་གནང་མྱོང་མཁན་སློབ་ཕྲུག་ཅིག་ཕྱི་ལོ་ ༢༠༡༧ ལོར་འདས་གྲོངས་སུ་ཕྱིན་པའི་རྗེས་དྲན་ཆེད་ཁོང་གི་ནང་མི་གཙོས་གྲོོགས་ཕོ་མོ་རྣམས་དང། དེ་བཞིན་ཕྱི་ལོ་ ༢༠༡༧ ལོར་ཐུ་ལན་གཙུག་ལག་སློབ་གྲྭའི་སྤྱི་ཚོགས་ཞུ་ཚན་པའི་ང་ཚོའི་རིག་གཞུང་བརྗེ་རེས་ཀྱི་ལས་གཞིའི་ནང་མཉམ་ཞུགས་གནང་མཁན་སློབ་ཕྲུག་ཚོ་ཁག་བཅས་ཐུན་མོང་ནས་མཐུན་འགྱུར་རོགས་རམ་གནང་བར་བརྟེན། ད་ལྟའི་ཆར་བུད་མེད་སྨན་ཞབས་སློབ་གཉེར་བ་གསུམ་མཐོ་སློབ་ཁག་སོ་སོའི་ནང་སློབ་གཉེར་གནང་བཞིན་ཡོད། དེ་དག་ནི།

༡༽ སྤོན་ཊ་སློབ་གྲྭ་(CST Poanta School) ནས་སློབ་ཐོན་པའི་ཚེ་རིང་སྒྲོལ་མ་ད་ལྟ་(Mata Sahib Kaur College of Nursing, Chandigarh) སྨན་ཁང་དུ་སྨན་ཞབས་སློབ་གཉེར་གནང་བཞིན་ཡོད།

༢༽བསྟན་འཛིན་ནོར་སྒྲོན་གྷོ་པལ་པུར་བོད་ཁྱིམ་ (TCV Gopalpur School) ནས་སློབ་ཐོན་གྱིས་ད་ལྟ་( Indraprastha Appolo Hospital Delhi) སྨན་ཁང་དུ་སྨན་ཞབས་སློབ་གཉེར་གནང་བཞིན་ཡོད།

༣༽ ཚེ་རིང་ཆོས་སྒྲོན་སྦེལ་ཀོབ་བོད་ཁྱིམ་(TCV Bylakuppe Schoo)ནས་སློབ་ཐོན་གྱིས་ད་ལྟ་(BGS Academy for Nursing Sciences, Mysore) སྨན་ཁང་དུ་སློབ་གཉེར་གནང་བཞིན་ཡོད་པ་བཅས་དང་།

ཨ་རི་ནས་ཡིན་པའི་སློབ་ཕྲུག་ཚོ་ཁག་དེ་ཉིད་དང་ང་ཚོའི་ཚོགས་པ་མཉམ་འབྲེལ་གྱིས་སྤྱི་ཚོགས་ཞབས་ཞུ་དང་རིག་གཞུང་བརྗེ་རེས་བྱས་ནས་དུས་ཡུན་རིང་པོ་ཕྱིན་ཡོད། འདི་ལོ་སློབ་ཕྲུག་ཚོགས་པ་དེ་དང་སྤྱི་ཚོགས་ཞབས་ཞུ་དང་རིག་གཞུང་བརྗེ་རེས་བྱས་པ་ཐེངས་བཅུ་བདུན་པ་ཆགས་ཀྱི་ཡོད། ཁོང་རྣམ་པས་རྒྱབ་སྐྱོར་ལ་བརྟེན་ནས་བོད་པའི་བུད་མེད་གསུམ་གྱི་མི་ཚེ་མདུན་ལམ་ལ་སྒྲོན་མེ་ཞིག་སྤར་ཡོད་པས། ང་ཚོའི་ཚོགས་པའི་ངོས་ནས་སྙིང་དབུས་ནས་བཀའ་དྲིན་བླ་མེད་དུ་ཆེ་བཅས་ཞུ་རྒྱུ་ལགས།