རིག་གཞུང་བརྗེ་རེས་ཀྱི་ལས་གཞི་དང་དམིགས་ཡུལ།
རྒྱལ་སྤྱིའི་ནང་གཞུང་དང་། གཙུག་ལག་སློབ་གྲྭ། མཐོ་སློབ་གཙོས་པའི་ཚོགས་སྡེ་སྒྲིག་འཛུགས་མང་པོས་གོ་སྒྲིག་གིས། རྒྱལ་ཁབ་དང་ཚོགས་པ་སྒྲིག་འཛུགས་དབར་མཁས་དབང་། ཁྱད་ལས་པ། ལུས་རྩལ་བ་གཙོས་པའི་གནད་དོན་དང་ལས་དོན་འདྲ་མིན་ཐོག་ཤེས་ཡོན་བརྗེ་རེས་བྱེད་སྲོལ་ཡོད་ཅིང་། ལྷག་པར་སློབ་གྲྭའི་གུང་སེང་དང་བསྟུན་སློབ་ཕྲུག་ཚོ་རྒྱལ་ཁབ་གཞན་ལ་ཆེད་བསྐྱོད་ཀྱིས་ཡུལ་དེ་དག་གི་རིག་གཞུང་དང་ཡུལ་སྲོལ་གོམས་གཤིས། ཡུལ་ལྗོངས་དང་ས་བབས་སོགས་ལ་རྒྱུས་ལོན་བྱེད་ཀྱི་ཡོད་པས། ང་ཚོས་ཚོགས་པའི་ལས་གཞི་འདི་གལ་ཆེན་དུ་རྩིས་ཏེ། ཕྱི་ལོ་ ༢༠༠༢ ལོར་ཐུ་ལན་ལས་རིགས་གཙུག་ལག་སློབ་གཉེར་ཁང་གིས་སྤྱི་ཚོགས་ཞབས་ཞུའི་ལས་རིགས་སློབ་ཐོན་སློབ་མ་ཁག་ཅིག་དྷ་རམ་ས་ལར་བོད་པའི་སྤྱི་ཚོགས་དང་རིག་གཞུང་རྗེ་རེས་བྱེད་བཅུག་པ་དང་སྦྲག ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་གིས་རྒྱལ་སྤྱིའི་རིག་གཞུང་བརྗེ་རེས་ཀྱི་ལས་རིམ་ཞིག་འགོ་བརྩམས་ཤིང་། ལས་འཆར་འདིའི་འོག་ང་ཚོས་མཐོ་སློབ་དང་གཙུག་ལག་སློབ་གྲྭའི་སློབ་ཕྲུག་ཚོ་ཁག་མི་འདྲ་བ་ ༡༣ ལ་རིག་གཞུང་བརྗེ་རེས་གོ་སྒྲིག་བྱེད་ཀྱི་ཡོད།
རྒྱབ་ཁབ་འགའ་ཤས་ནས་ཆེད་དུ་ཕེབས་པའི་སློབ་ཕྲུག་དང་ཁྱད་ལས་པ་བསྡོམས་པའི་ལོ་ལྟར་ཆ་ཤས་ལེན་མཁན་མི་གྲངས་ ༡༤༢ ཡས་མས་ཡོང་སྟེ། སྨན་གྱི་ཁྱད་ལས་པ་རྣམས་ཀྱིས་ང་ཚོའི་མིག་དང་སོ་ལ་བརྟག་དཔྱད་དང་འབྲེལ་བའི་འཕྲོད་བསྟེན་གྱི་ལས་གཞི་ལ་དྭང་བླངས་ཀྱིས་ཞབས་ཞུ་གནང་ཞིང་། ཕྱི་རྒྱལ་གྱི་སློབ་མ་མང་ཆེ་བས་ལྷའི་སྐད་ཡིག་འཛིན་གྲྭའི་སློབ་མ་རྣམས་ཀྱི་ཨིན་ཡིག་དང་། ཧྤ་རན་སིའི་སྐད། རྒྱ་སྐད་སོགས་ཡར་རྒྱས་ཡོང་བར་རོགས་རམ་དང། ཁོང་ཚོས་དྭང་བླངས་ཞབས་ཞུ་གནང་བའི་ཞོར་དུ། ང་ཚོའི་ངོས་ནས་བཙན་བྱོལ་བོད་མིའི་སྤྱི་ཚོགས་དང་། བོད་ཀྱི་རིག་གཞུང་། ནང་ཆོས། བོད་སྨན། ད་ལྟའི་བོད་ཀྱི་གནས་སྟངས་སོགས་ལ་རྒྱུས་ལོན་དང་ཞིབ་འཇུག་སླད་བོད་པའི་གཞུང་དང་གཞུང་འབྲེལ་མ་ཡིན་པའི་ཚོགས་སྡེ་ཁག་ལ་གཟིགས་སྐོར་སྣེ་ཁྲིད་དང་། མཁས་དབང་སོགས་གདན་དྲངས་ནས་བརྗོད་གཞི་འདྲ་མིན་ཐོག་གསུང་བཤད་གོ་སྒྲིག་གིས། ཁོང་ཚོར་བོད་པའི་ཡུལ་སྲོལ་གོམས་གཤིས་དང་། རིག་གཞུང་། ནང་ཆོས། སྨན་རྩིས། བོད་ནང་གི་འགྲོ་བ་མིའི་ཐོབ་ཐང་། ད་ལྟའི་བོད་ཀྱི་གནས་བབས་སོགས་ཀྱི་སྐོར་འགྲེལ་བརྗོད་དང་གོ་རྟོགས་སྤེལ་གྱི་ཡོད།
ང་ཚོས་རྒྱལ་སྤྱིའི་སློབ་གླིང་འདྲ་མིན་ནས་རིག་གཞུང་བརྗེ་རེས་བྱེད་མཁན་གྱི་སློབ་ཕྲུག་ལ་སྣེ་ལེན་བྱས་པ་ལོ་རེ་ནས་ཇེ་མང་དུ་ཕྱིན་པ་བརྒྱུད། ཕྱི་ལོ་ ༢༠༠༨ ལོར་ང་ཚོས་ནུབ་ཕྱོགས་ཀྱི་སློབ་གླིང་འདྲ་མིན་ནས་སློབ་ཕྲུག་ཚོ་ཁག་ ༧ ལ་རིག་གཞུང་བརྗེ་རེས་ཀྱི་ལས་རིམ་གོ་སྒྲིག་བྱས་ཤིང་། ཕྱི་ལོ་ ༢༠༠༩ ལོར་གྲངས་ཚད་ཡར་འཕར་ནས་སློབ་ཕྲུག་ཚོ་ཁག་ ༡༡ ལ་གོ་སྒྲིག་བྱས། ཕྱི་ལོ་ ༢༠༡༠ ལོར་མཐོ་སློབ་དང་གཙུག་ལག་སློབ་གཉེར་ཁང་བཅས་ནས་སློབ་ཕྲུག་ཚོ་ཁག་ ༡༢ དང། ད་ལྟའི་ཆར་གཙུག་ལག་སློབ་གྲྭ་དང་མཐོ་སློབ། དེ་བཞིན་ཚོགས་སྡེ་སྒྲིག་འཛུགས་ཁག་ནས་ཚོ་ཁག་ ༡༣ ཙམ་མཉམ་ཞུགས་བྱས་པ་དང་འབྲེལ། ལོ་ལྟར་ལས་རིམ་འདིའི་ནང་མཉམ་ཞུགས་གནང་མཁན་སློབ་ཕྲུག་གྲངས་ ༡༢༠ ནས་ ༢༠༠ ཙམ་ཟིན་གྱི་ཡོད་ཅིང་། རིག་གཞུང་བརྗེ་རེས་ཀྱི་ལས་རིམ་ནང་། ང་ཚོས་ནུབ་ཕྱོགས་ཀྱི་སློབ་ཕྲུག་རེ་རེ་ལྷ་སྤྱི་ཚོགས་ཞབས་ཞུ་ཚོགས་པའི་སྐད་ཡིག་འཛིན་གྲྭ་ཁག་གི་ནང་སློབ་སྦྱོང་བྱེད་བཞིན་པའི་སློབ་མ་རེ་དང་མཚམས་སྦྱོར་གྱིས་ལྷའི་སློབ་ཕྲུག་མང་ཆེ་བ་ཕྱི་རྒྱལ་གྱི་སྐད་ཡིག་བྱང་ཆུབ་པ་དེ་འདྲ་མིན་ཡང་རྒྱུན་དུ་ཁོང་ཚོ་ཚང་མས་སློབ་སྦྱོང་དང་རང་ཉིད་ཀྱི་ཉམས་མྱོང་ཁག་གཞན་ལ་ཤོད་རྒྱུར་དགའ་མོས་དང་འབད་བརྩོན་ཆེན་པོ་བྱེད་མཁན་ཤ་སྟག་ཡིན་སྟབས། ཁོང་ཚོའི་ཉམས་མྱོང་དང་དཀའ་སྡུག་གི་ལོ་རྒྱུས་རྣམས་ཇི་བཞིན་གཞན་ལ་འགྲེལ་བརྗོད་བྱས་པ་བརྒྱུད་ཨིན་སྐད་ཀྱང་ཡར་རྒྱས་གཏོང་རྒྱུའི་གོ་སྐབས་རག་གི་ཡོད། མ་ཟད་རིག་གཞུང་བརྗེ་རེས་ཆེད་ཕེབས་པའི་སློབ་ཕྲུག་རྣམས་ཁོང་ཚོའི་གྲོགས་པོ་དང་སྤུན་མཆེད་སོགས་ཀྱི་ནང་ལ་ཁྲིད་ནས་ངོ་སྤྲོད་དང་། གཞན་ཡང་སྐྱབས་བཅོལ་བོད་མི་མང་པོ་དང་འབྲེལ་འདྲིས་རྒྱུས་ལོན་བྱེད་པའི་གོ་སྐབས་ཡང་བསྐྲུན་གྱི་ཡོད།
ཚོགས་པའི་རིག་གཞུང་བརྗེ་རེས་བྱེད་མཁན་གྱི་སློབ་ཕྲུག་རྣམས་ལ། ཁོང་ཚོའི་འདོད་མོས་དང་བསྟུན་ནས། བོད་ཀྱི་སྐད་ཡིག་དང་། བོད་ཟས། བོད་མིའི་སྒྱུ་རྩལ། རྩ་རླུང་ལུས་སྦྱོང་། བསྐུ་མཉེ་སོགས་འདྲ་མིན་སློབ་ཁྲིད་བྱེད་ཀྱི་ཡོད་པ་དང་། ལས་རིམ་ཆུང་གྲས་ཁག དཔེར་ན། ཁོར་ཡུག་གཙང་བཟོ་དང་། ལྷའི་སྤྱི་ཐབ་ནང་ཞབས་ཞུ་བྱ་རྒྱུ་བཅས་ཀྱི་གོ་སྐབས་སྤྲོད་ཀྱི་ཡོད། རིག་གཞུང་བརྗེ་རེས་ཆེད་ཕེབས་པའི་སློབ་མ་མང་ཆེ་བ་ལྷའི་ཞི་བའི་ཚལ་ (Ahimsa House) ནང་སྡོད་གནས་གོ་སྒྲིག་གིས། ང་ཚོས་སྔ་དགོང་གཉིས་ཀའི་ཞལ་ལག་གོ་སྒྲིག་ཞུས་ཏེ། བོད་མིའི་སྲོལ་རྒྱུན་གྱི་ཞལ་ལག་ཐེ་བའི་ཉིན་ལྟར་ཞལ་ལག་སྣེ་ཁ་ ༩ ནས་ ༡༣ བར་ཡོད། དེའི་ནང་ཤ་ཡོད་དང་ཤ་མེད་གཉིས་ཀ་ཡོད་པས་སློབ་ཕྲུག་ཚོས་བོད་མིའི་རོ་བཅུད་ལྡན་པའི་ཞལ་ལག་རིགས་འདྲ་མིན་ཡང་ལོངས་སུ་སྤྱོད་ཀྱི་ཡོད།
དེ་བཞིན་ཁོང་ཚོ་ས་ཕྱོགས་གང་འདྲ་ཞིག་ནས་རྒྱ་གར་ལ་འབྱོར་ཡང་། དེ་མ་ཐག་ཚོགས་པའི་ལས་བྱེད་དང་འབྲེལ་མཐུད་མི་སྣས་ལྡི་ལི་གནམ་ཐང་སོགས་ནས་སྣེ་ལེན་དང་། བདེ་འཇགས་ཐོག་འགྲུལ་བཞུད་གོ་སྒྲིག་བྱེད་ཀྱི་ཡོད། གཞན་ཡང་ང་ཚོས་དྷ་སའི་ཉེ་འཁོར་དུ་ཡོད་པའི་ནོར་བུ་གླིང་ཁ་དང་། རྒྱུད་སྟོད་གྲྭ་ཚང་། བོད་ཕྲུག་ཁྱིམ་སྡེ། བོད་ཀྱི་འགྲེམས་སྟོན་ཁང་། ཐེག་ཆེན་ཆོས་གླིང་གཙུག་ལག་ཁང་། བོད་ཀྱི་དཔེ་མཛོད་ཁང་། དབུས་བོད་མིའི་སྒྲིག་འཛུགས། སྨན་རྩིས་ཁང་སོགས་སུ་སྐོར་སྐྱོད་དུ་ཁྲིད་ནས་སློབ་ཕྲུག་རྣམས་ཀྱིས་བོད་ཀྱི་རིག་གཞུང་དང་། བཙན་བྱོལ་བོད་མིའི་གནས་སྟངས་གང་མང་རྒྱུས་ལོན་ཐུབ་ཐབས་བྱེད་ཀྱི་ཡོད།
ད་ལྟའི་ཆར་ཚོགས་པས་ལོ་ལྟར་དབྱར་དུས་སུ། ཐུ་ལན་སྤྱི་ཚོགས་ཞབས་ཞུའི་ལས་རིགས་སློབ་གླིང་ (Tulane School of Social Work) དང་། ཐུ་ལན་གཙུག་ལག་སློབ་གཉེར་ཁང་། (Tulane University) སན་ཊེ་ནཱ་རེ་མཐོ་རིམ་སློབ་གཉེར་ཁང་། ལོ་ཡོ་ལཱ་གཙུག་ལག་སློབ་གཉེར་ཁང་། (Centenary College Loyola University) དེ་བཞིན་རཱ་སི་ཊི་ཀི་པཱ་ཐི་ཝེ་དང་། (Rustic Path Way) གྷོ་བྷེ་ཡོན་ཌ་ (Go Beyond)། ལུ་སི་ཡ་ན་མངའ་སྡེ་གཙུག་སློབ་གྲྭ། (Louisiana State University) མིག་སོ་ཁོ་མཐོ་རིམ་སློབ་གྲྭ་ (Tec De Monterrely) སོགས་གཙོས་པའི་རྒྱལ་སྤྱིའི་ནང་སྐད་གྲགས་ཆེ་བའི་གཙུག་ལག་སློབ་གྲྭ་དང་། མཐོ་སློབ། རིག་གཞུང་བརྗེ་རེས་གོ་སྒྲིག་བྱེད་མཁན་ཚོགས་སྡེ་ཁག་དང་མཉམ་འབྲེལ་གྱིས། སློབ་མ་དང་རིག་གཞུང་བརྗེ་རེས་བྱེད་པའི་ལས་རིམ་གོ་སྒྲིག་ཞུ་བཞིན་ཡོད་ཅིང་། ད་བར་དགེ་སློབ་གྲངས་ ༡༥༨༡ ལྷག་ཙམ་གྱིས་ལས་གཞི་འདིར་ཆ་ཤས་བླངས་ཏེ་ཕན་རླབས་ཆེན་པོ་བྱུང་ཡོད། རིག་གཞུང་བརྗེ་རེས་གནང་མཁན་གྱི་སློབ་མ་མང་ཆེ་བ་དབྱར་དུས་ཡོང་གི་ཡོད་ཀྱང་། དེ་མིན་གྱི་དུས་ཚོད་གཞན་ཁག་ལའང་ང་ཚོས་གོ་སྒྲིག་བྱེད་ཀྱི་ཡོད། རིག་གཞུང་བརྗེ་རེས་གནང་མཁན་གྱི་སློབ་ཕྲུག་རྣམས་འདི་གར་སྡོད་པའི་དུས་ཡུན་ནི་བདུན་ཕྲག་གཅིག་ནས་ཟླ་བ་གཅིག་ཙམ་བར་ཡིན།
རྒྱལ་སྤྱིའི་རིག་གཞུང་བརྗེ་རེས་ཀྱི་སློབ་ཕྲུག་ཚོས་དྷ་རམ་ས་ལ་དང་བཙན་བྱོལ་བོད་མིའི་འཚོ་བ་བཅས་ལ་རྒྱུས་ལོན་དང་། ཕན་ཚུན་འབྲེལ་འདྲིས། བོད་ཀྱི་ནང་ཆོས་དང་རིག་གཞུང་སྣ་ཚོགས་རྒྱུས་ལོན་གང་ལེགས་གནང་གི་ཡོད་པས་ཕྱོགས་གཉིས་ཀར་ཕན་ཐོགས་ཆེན་པོ་ཡོང་གི་ཡོད། རིག་གཞུང་བརྗེ་རེས་བྱེད་སྐབས། ལྷའི་སྐྱབས་བཅོལ་བོད་མི་སློབ་མ་རེ་རེས་བོད་པའི་སྐད་ཡིག་དང་རིག་གཞུང་གི་སྐོར་དང་། རྒྱ་ནག་གིས་བོད་ལ་བཙན་འཛུལ་བྱེད་སྟངས་དང་། བོད་ནང་གི་འགྲོ་བ་མིའི་ཐོབ་ཐང་། ཆོས་དད་རང་དབང། བོད་མིར་མནར་གཅོད་གཏོང་སྟངས། བོད་ནས་སྐྱབས་བཅོལ་དུ་ཡོང་སྐབས་དཀའ་སྡུག་ཅི་ཙམ་འཕྲད་ཀྱི་ཡོད་མེད་སོགས་འགྲེལ་བརྗོད་བྱེད་པ་དང་། སྐྱབས་བཅོལ་དུ་འབྱོར་རྗེས་ཆོས་དད་རང་དབང་སོགས་ཕྱོགས་མང་པོ་ཞིག་ནས་རང་དབང་ཁེ་ཕན་ཡོད་ཀྱང་། ནང་མི་དང་སྤུན་མཆེད་སོགས་ཡོད་ཚད་རྒྱབ་ཏུ་བསྐྱུར་དགོས་པའི་གནས་སྟངས་འོག་སྐྱབས་བཅོལ་བའི་མི་ཚེའི་ནང་གི་འཚོ་བའི་དཀའ་ངལ་སྐོར་གྱི་མྱོང་ཚོར་ཤོད་ཀྱི་ཡོད།
རྒྱལ་སྤྱིའི་རིག་གཞུང་བརྗེ་རེས་གནང་མཁན་གྱི་སློབ་ཕྲུག་ཚོས་ང་ཚོའི་རིག་གཞུང་བརྗེ་རེས་ཀྱི་ལས་རིམ་ལ་ཆ་ཤས་བླངས་པ་བརྒྱུད། བོད་མིའི་ཆོས་དང་རིག་གཞུང་། བོད་ནང་གི་ཆབ་སྲིད་ཀྱི་གནས་སྟངས། སྐྱབས་བཅོལ་བོད་མིའི་འཚོ་བ་བཅས་རྒྱུས་ལོན་ཡག་པོ་གནང་ཐུབ་པའི་གོ་སྐབས་དང་སྡིངས་ཆ་གལ་ཆེན་ཞིག་ཆགས་ཡོད། དེ་བཞིན་བོད་དོན་དྲིལ་བསྒྲགས་དང་གོ་རྟོགས་གང་ལེགས་སྤེལ་ཐུབ་ཀྱི་ཡོད་པ་རེད། རིག་གཞུང་བརྗེ་རེས་ཆེད་དུ་ཁོ་ན་མིན་པར་རྒྱལ་སྤྱིའི་ཚོགས་སྡེ་དང་གཙུག་ལག་སློབ་གྲྭ། དེ་བཞིན་གྲགས་ཆེའི་གསར་འགྱུར་རྒྱུད་ལམ་དང་མི་སྒེར་བ་ཞིབ་འཇུག་གནང་མཁན་ཆེས་མང་པོ་ཕེབས་ནས་བོད་པའི་སྤྱི་ཚོགས་དང་བོད་ཀྱི་གནད་དོན་སྐོར་རྒྱུས་ལོན་དང་ཤེས་རྟོགས་གནང་མཁན་དུས་ནས་དུས་སུ་ཕེབས་པ་རྣམས་ལའང་འབྲེལ་ཡོད་གནད་དོན་མང་པོའི་ཐོག་གནས་ཚུལ་མཁོ་སྤྲོད་བྱེད་ཀྱི་ཡོད་པ་རེད།
རིག་གཞུང་བརྗེ་རེས་གནང་མཁན་སློབ་མ་ཚོའི་དགོངས་ཚུལ།
ཁང་པ་དེ་ངོ་མཚར་དང་ལྡན། ཧ་ལམ་ང་ཞི་བའི་ཚལ་དུ་སྡོད་སྐབས་ཀྱི་ཆེས་དགའ་སའི་གནས་ཤིག་ཡིན་ངེས། ཁང་པ་དེ་རྒྱུན་དུ་ཧ་ཅང་གཙང་མ་དང་། གུ་ཡངས་པོ་རེད། ལྷའི་སྤྱི་ཐབ་ནས་གནང་བའི་ཞལ་ལག་ཀྱང་ངོ་མཚར་ཆེ། བཟའ་མ་མང་པོ་འདེམས་རྒྱུ་ཡོད་པ་དེར་ང་དགའ་པོ་ཡོད།
བྷི་ནཱན་ནཱ་མན་ནེརི། (Bnanna Manieri) ཡིས།
འདི་ནི་ཤིན་ཏུ་བཟང་བའི་ཉམས་མྱོང་ཞིག་སྟེ་ངས་བལྟས་ན་ངའི་མི་ཚེའི་ནང་གི་ཆེས་བཟང་བ་དེའང་རེད། ངའི་མི་ཚེའི་ནང་མ་མཐར་ཡང་ཐེངས་ཤིག་ལ་ཕྱིར་ཡོང་ནས་ལྷ་ལ་དྭང་བླངས་ཀྱིས་རོགས་རམ་བྱེད་ཐུབ་པའི་རེ་བ་ཡོད། མི་རྣམས་ཀྱིས་བརྩེ་སེམས་ངང་། ཕན་ཚུན་རོགས་བྱེད་པ་འདི་དག་མཐོང་དུས་ཤིན་ཏུ་སྐྱིད། ང་བོད་ལ་ཧ་ཅང་དགའ།
ཕཱ་ལི་ནཱ་ཨཱ་བྷདྷི་ཝེ་ནཱི་གྷ་སི་ (Palina Abad Venegas) ཡིས།
ཆུ་ཚ་པོ་དང་། སྐུད་མེད་དྲ་བ། བཙགས་ཆུ་བེད་སྤྱོད་པ་སོགས་ཞི་བའི་ཚལ་འདི་ངོ་མཚར་ཆེ་བ་ཞིག་རེད། གསོལ་ཚིགས་ཀྱང་ཧ་ཅང་ལེགས། ང་ཤ་མེད་ཀྱི་རིགས་ལ་དགའ་པོ་ཡོད། ཞོགས་ཇ་ཡང་དེ་བས་ལེགས། ཤིང་ཏོག་ནི་ག་དུས་ཡིན་ཡང་སོས་པ་རེད།
ཇཱོ་ནཱ་ཇཱོཧན་སོན་ (Joanna Johnson) གྱིས།
སྡོད་གནས་དེ་ཧ་ཅང་ངོ་མཚར་ཆེ་ཞིང་ཨ་རིའི་བཟའ་མ་ཞོགས་ཟས་དང་དགོང་ཟས་མཉམ་བསྲེས་གཏོང་བ་ཡང་མཐོང་བ་དང་། དྭང་བླངས་བྱས་པ་ནི་རླབས་ཆེའི་ཉམས་མྱོང་ཞིག་རེད། ངའི་ཚོར་སྣང་ལ་ངའི་སློབ་གཉེར་རོགས་ཟླས་ང་ལས་གང་སྦྱངས་པ་བཞིན་ངས་ཀྱང་ཁོ་མོ་ལས་དེ་བཞིན་སྦྱངས་ཡོད། སྤྲོ་སེང་སྐོར་སྐྱོད་ཀྱི་མཐོང་རྒྱུ་ཧ་ཅང་རིན་ཐང་ལྡན་ཞིང་། ང་ཚོའི་ཤེས་རྟོག་གོང་འཕེལ་བཏང་ཡོད་པར་གདོན་མི་ཟའོ།།
མཱེ་གྷེའི་ཧཱར་མེན་ (Maggie Hermann) གྱིས།
ལྷའི་ཞི་བའི་ཚལ་གྱི་ཁང་པ་ལྟ་ན་སྡུག་ཅིང་གྲ་སྒྲིག་ལེགས་པར་བྱས་འདུག ཨ་ཅོར་དང་། མལ་སྟན་ལྷག་མ། ཁྲུས་ཁང་སོགས་ཡོད་ཚད་གཙང་སྦྲ་དོད་པོ་འདུག དཔེ་ཁང་དེས་རླབས་ཆེན་གྱི་ཚོར་སྣང་སྐྲུན་ཞིང་། གསོལ་ཚིགས་ཀྱང་ཤིན་ཏུ་ལེགས།
རྗོའི་སིན་ནོ་ལིའི་ (Joe Signorelli) ཡིས།
དེ་ངོ་མཚར་ལྡན་པ་ཞིག་རེད། ལྷའི་བྱ་འགུལ་འདི་དག་ལ་བཀྲ་ཤིས་བདེ་ལེགས་ཞུ་བར་གུས་ཧ་ཅང་དགའ་པོ་བྱུང་། ༧གོང་ས་མཆོག་གི་གསུང་སྒྱུར་བ་དང་། བོད་ཀྱི་སྲིད་སྐྱོང་དང་ཁོང་གི་གྲོས་ཚོགས་སོགས་མཇལ་འཕྲད་བྱས་པ་དེ་དག་བརྗེད་མི་སྲིད་པའི་ཤེས་ཚོར་ཞིག་རེད་ལ། ཚོགས་པ་སྐྱིད་སྡུག་མང་པོ་ཞིག་གི་དབུ་འཛིན་ལ་ཐུག་འཕྲད་དང་གླེང་མོལ་སོགས་ནི་ངས་ནམ་ཡང་བརྗེད་མི་སྲིད་པའི་ཉམས་མྱོང་ཞིག་རེད། བྱ་འགུལ་འདི་དག་མུ་མཐུད་དང་འདིས་ང་ཚོའི་མི་ཚེ་དང་། རང་ཉིད་ལ་ལྟ་སྟངས་སོགས་ཡོད་ཚད་ལ་ལེགས་བཅོས་གཏོང་སྲིད། འདི་ནི་ངའི་བསམ་ཚུལ་ཡིན།
ཌེ་ནཱེ་ལིན་མེ་རན་དྷ་ (Daniely Miranda) ཡིས།
ང་གུས་མོའི་སློབ་གཉེར་གྱི་ཟླ་གྲོགས་ལ་ཧ་ཅང་དགའ། ལས་གཞི་དེས་ང་ལ་བོད་དུ་ཅི་ཞིག་འབྱུང་བཞིན་པ་དང་། ང་ཨ་རི་བ་ཞིག་