བོད་མི་མང་སྤྱི་འཐུས་ལྷན་ཚོགས་ཀྱི་གསུང་འཕྲིན།
༄༅།། ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་དབུ་བརྙེས་ནས་ལོ་ཉི་ཤུ་འཁོར་བའི་དུས་ཆེན་ལ། ངས་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་སེམས་གཏིང་ནས་བཀྲ་ཤིས་བདེ་ལེགས་ཞུ་བ་དང་། ཕྱི་ལོ་ ༡༩༩༧ ནས་བཟུང་སྐུ་ཉིད་ཀྱིས་གནང་བཞིན་པའི་རླབས་ཆེའི་སྤྱི་ཚོགས་ཀྱི་ཞབས་ཞུ་ལ་ཚད་མཐོའི་གདེང་འཇོག་དང་ཡིད་རང་ཞུ་རྒྱུ་ཡིན། ལྷ་ཚོགས་པས་རྒྱ་གར་དུ་ཡོད་པའི་སྐྱབས་བཅོལ་བོད་མིར་དོན་སྙིང་ལྡན་པའི་རོགས་རམ་མང་པོ་གནང་བཞིན་ཡོད་པར་ཤེས་རྟོགས་བྱུང་བར་ཤིན་ཏུ་དགའ་པོ་བྱུང་། དེར་མ་ཟད་བོད་ཀྱི་རིག་གཞུང་དང་། སྐད་ཡིག ལེགས་བྱང་སོགས་སྲུང་སྐྱོབ་དར་སྤེལ་དང་། གོ་ལའི་ཁྱོན་ལ་བོད་དོན་གོ་རྟོགས་སྤེལ་བ་སོགས་ལྷ་ཚོགས་པའི་བཅོས་མིན་གྱི་ཆོད་སེམས་དང་སྙིང་སྟོབས་ལ་རྗེས་སུ་ཡིད་རང་དང་བསྔགས་བརྗོད་ཞུ་བཞིན་ཡོད། དེ་བཞིན་ལྷ་ཚོགས་པ་བཙན་བྱོལ་སྤྱི་ཚོགས་ནང་འདི་ལྟ་བུའི་ལམ་ལྷོངས་ཅན་དུ་བསྐྲུན་པར་ཕྱག་ལས་གནང་མཁན་ཡོངས་ལའང་བསྟོད་བསྔགས་ཞུ་རྒྱུ་ཡིན།
ལྷའི་ལས་བྱེད་ཚང་མ་ལ་བསྐྱར་དུ་བཀྲ་ཤིས་བདེ་ལེགས་ཞུ་རྒྱུ་དང་། ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་གིས་སྤྱི་ཚོགས་ཞབས་ཞུ་དང་། ང་ཚོའི་རྩ་ཆེའི་རིག་གཞུང་འཛམ་གླིང་ཀུན་ལ་སྤེལ་བའི་ལས་དོན་གྱི་རིགས་མུ་མཐུད་དེ་གནང་རྒྱུའི་རེ་བ་དང་སྨོན་འདུན་བཟང་པོ་བཅས་ཚོགས་གཙོ་མཁན་པོ་བསོད་ནམས་བསྟན་འཕེལ་གྱིས།