ཨ་རི་དང་ཨིན་ཡུལ་ནས་ཕེབས་པའི་རིག་གཞུང་བརྗེ་རེས་ཀྱི་ཚོགས་ཁག
ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་གི་རིག་གཞུང་བརྗེ་རེས་ལས་གཞི་འོག་འདི་ལོ་ཟླ་༧པའི་ནང་སྐུ་ཞབས་མཡེ་ཁལ་ལགས་དང་ཁོང་གི་བཟའ་ཟླ་པདྨ་ལགས་རྣམ་གཉིས་ཀྱིས་སྣེ་ཁྲིད་པའི་ཨ་རི་ནས་སློབ་ཕྲུག་ཚོགས་ཁག་མི་འདྲ་བ་གཉིས་ལྷ་ཞི་བའི་ཚལ་དུ་གནས་སྡོད་ཀྱིས་རིག་གཞུང་བརྗེ་རེས་ལ་མཉམ་ཞུགས་གནང་ཡོད་ཅིང་།
ང་ཚོའི་རིག་གཞུང་བརྗེ་རེས་ཀྱི་དམིགས་ཡུལ་གཙོ་བོ་ནི་བོད་ཀྱི་ཆོས་དང་རིག་གཞུང་སྲོལ་རྒྱུན་གོམས་གཤིས།དེ་བཞིན་བོད་པའི་བཙན་བྱོལ་བའི་སྤྱི་ཚོགས་གནས་སྟངས་སོགས་ངོ་སྤྲོད་གནང་རྒྱུ་དང་།
བོད་པའི་གཞོན་སྐྱེས་རྣམས་ལ་ནུབ་ཕྱོགས་པའི་གནས་སྟངས་སོགས་ཀྱི་ཤེས་བྱ་ངོ་སྤྲོད་ཐོབ་རྒྱུ་འབད་བརྩོན་ཞུ་མུས་ཡིན།སློབ་ཕྲུག་ཚོགས་ཁག་གཉིས་ནི་ཏུན་ལན་(TulaneUniversity) གཙུག་ལག་སློབ་གཉེར་ཁང་དང་ལོ་ཡ་ལ་མཐོ་སློབ་ནས་སྨན་པའི་སློབ་ཐོན་སློབ་མ་(Loyalaundergraduatestudents) ཡིན་པ་རེད།
སྨན་པའི་ཚོགས་ཁག་དེར་༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་མཇལ་བཅར་གྱིས་སྐལ་བཟང་གི་གོ་སྐབས་དང་བཀའ་སློབ་ལམ་སྟོན་ཡང་ཐོབ་ཡོད་པ་དང་། ༧གོང་ས་མཆོག་གིས་ ༼སྨན་པ་ཚོས་སྨན་བཅོས་སྐབས་ནད་པར་འཛུམ་མདངས་ཀྱི་རྣམ་འགྱུར་བསྟན་ནས་ནད་པའི་སེམས་ལ་བདེ་སྐྱིད་བསྐྲུན་གལ་ཆེ་བ་དང་སྨན་པ་བཟང་པོ་ཞིག་ཆགས་པར་བྱམས་བརྩེ་ནི་མེད་དུ་མི་རུང་བ་ཞིག་རེད་༽ཅེས་གསུངས་འདུག ཚོགས་ཁག་དེས་རྡ་ས་ཉེ་ཁོར་དུ་ཡོད་པའི་དགོན་སྡེ་ཁག་དང་སྦིར་དུ་དགོན་སྡེ་ཁག་བཅས་ནང་འཕྲོད་བསྟེན་གྱི་ལས་རིམ་ལས་གྲྭ་བཙུན་མི་ཉུང་བ་ཞིག་ལ་རིན་མེད་ཀྱིས་ཐོག་བརྟག་དཔྱད་འདྲ་མིན་གནང་ཡོད་པ་རེད། གཞན་ཡང་ཨིན་ཡུལ་ནས་མཐོ་རིམ་སློབ་གྲྭ་མི་འདྲ་བ་ཁག་བཞིའི་སློབ་མ་རྣམས་ཀྱང་ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་གི་སློབ་ཕྲུག་དང་རིག་གཞུང་བརྗེ་རེས་མཉམ་ཞུགས་དང་། ད་ལྟའི་བོད་པའི་བཙན་བྱོལ་སྤྱི་ཚོགས་གནས་སྟངས་ཀྱི་སྐོར་དང་ཁེ་མེད་སྤྱི་ཚོགས་ཞབས་ཞུ་སྒྲུབ་སྟངས་སོགས་ཀྱི་སྐོར་གླེང་མོལ་གནང་ཡོད་པ་དང་། ལས་རིམ་དེ་གྲུབ་མཚམས་སུ་རྒྱུན་གཏན་ཚོགས་བཞིན་པའི་ཉིན་རྒྱབ་ཆུ་ཚོད་༤ ནས་༥ བར་ཨིན་ཡིག་ཁ་བརྡ་འཛིན་གྲྭར་མཉམ་ཞུགས་ཀྱིས་བོད་པའི་སློབ་ཕྲུག་རྣམས་ལ་ཨིན་སྐད་སྦྱོང་བརྡར་གྱི་རོགས་རམ་གནང་ཡོད་པ་རེད། གོ་སྐབས་འདི་བརྒྱུད་ནས་ང་ཚོའི་ལས་གཞིར་མཉམ་ཞུགས་དང་རྒྱབ་སྐྱོར་གནང་མཁན་འབྲེལ་ཡོད་ ཚང་མར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན།
