༢༠༡༩ ལོའི་བོད་ཀྱི་སྲོལ་རྒྱུན་ཕུར་མཉེའི་སྦྱོང་བརྡར་ལས་རིམ་ཐེངས་དང་པོ་ལེགས་གྲུབ་བྱུང་བ།
ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་གིས་གོ་སྒྲིག་དང་། ཨ་རིའི་བོད་ཀྱི་ཐེབས་རྩས་མཐུན་འགྱུར་འོག་གངས་ལྗོངས་བདེ་ཐང་ལྟེ་གནས་དང་མཉམ་འབྲེལ་གྱིས་རང་རིགས་གཞོན་སྐྱེས་རྣམས་ཀྱི་ཆེད་ ༢༠༡༩ ཟླ་ ༥ ཚེས་༨ ནས་ ཟླ་ ༨ ཚེས་ ༢༨ བར་དུས་ཡུན་ཟླ་བ་བཞི་ཙམ་རིང་བོད་ཀྱི་སྲོལ་རྒྱུན་ཕུར་མཉེའི་སྦྱོང་བརྡར་ཞིག་འགོ་འཛུགས་གནང་ཡོད་ཅིང་། དེར་འཛུལ་ཞུགས་གནང་མཁན་རང་རིགས་གཞོན་སྐྱེས་གྲངས་བཅུ་ཙམ་བྱུང་ཡོད། སྦྱོང་བརྡར་གྱི་རྣམ་གྲངས་ལས་རིམ་ལས་བོད་ཀྱི་སྲོལ་རྒྱུན་ཕུར་མཉེ་ཆ་ཚང་། སུ་ཌན་སྲོལ་རྒྱུན་ཕུར་མཉེ་དང་དྲི་ཞིམ་གསོ་ཐབས་ཕུར་མཉེའི་ངོ་སྤྲོད།ཟླ་བ་གཅིག་དང་ཕྱེད་ཀ་རྩ་བའི་སློབ་ཁྲིད་དང་ཟླ་བ་གཉིས་དང་ཕྱེད་རིང་ལག་ལེན་གྱི་ཐོག་ནས་སྦྱོང་བརྡར་དང་། ལས་ཀ་དངོས་གཞིའི་སྦྱོང་བརྡར་སྤྲོད་བཞིན་ཡོད་པ་རེད།
དེ་བཞིན་གང་ཟག་རང་ཉིད་ཀྱི་སྤྱོད་ལམ་གོང་མཐོར་གཏོང་ཐབས་དང་། གཞི་རྩའི་དཔལ་འབྱོར་འདུ་འགོད་གྱི་གོ་རྟོགས། དེ་བཞིན་རྨང་གཞི་ཨིན་སྐད་སྦྱོང་བརྡར་ལ་སོགས་པའི་སློབ་ཚན་གཞན་ཁག་འགའ་ཤས་ཀྱང་ལས་གཞི་དེའི་ནང་ཚུད་ཡོད་པ་རེད། དེ་མ་ཟད་བསླབ་པ་མཐར་སོན་གྱི་ཕྱག་འཁྱེར་འབུལ་རྒྱུ ། མ་འོངས་པའི་མདུན་ལམ་གྱི་ཆེད་དུ་ལས་ཀ་འཚོལ་ཐབས་ཀྱི་གཞོགས་འདེགས་གནང་རྒྱུ ། སྦྱོང་བརྡར་གྱི་དུས་ཡུན་རིང་ཉིན་གུང་ཞལ་ལག་རིན་མེད་དུ་འབུལ་རྒྱུ་བཅས་རང་རིགས་སྤྱི་ཚོགས་སུ་གཞོན་སྐྱེས་རྣམས་ལ་ཞབས་ཞུ་སྒྲུབ་རྒྱུ་གོ་སྐབས་ཐོབ་པ་ནི་འབྲེལ་ཡོད་རྣམས་ཀྱིས་མཐུན་འགྱུར་དང་རྒྱབ་སྐྱོར་རོགས་རམ་ལ་བརྟེན་ནས་བྱུང་བ་ཡིན་པས་ཚང་མར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་དང་། སྦྱོང་བརྡར་ལས་རིམ་ཐེངས་པ་གཉིས་པ་དེ་བཞིན་༢༠༡༩ ཟླ་ ༧ ཚེས་ ༡ ནས་འགོ་འཛུགས་བྱ་རྒྱུ་ཡིན་པ་རེད།
