ཚོགས་པ་ཁག་མི་འདྲ་བ་གཉིས་དང་རིག་གཞུང་བརྗེ་རེས་བྱས་པ།
ཕྱི་ལོ༢༠༡༨ ཟླ་༩ པའི་ནང་ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་གིས་སྣེ་ལེན་འོག་སྐུ་ཞབས་རོན་མརཁིསེ(Dr Ron Marks)ལགས་ཀྱིས་སྣེ་ཁྲིད་པའི་ཨ་རིའི་ཏུན་ལེན་སྤྱི་ཚོགས་ཞབས་ཞུའི་སློབ་ཕྲུག་བཅུ་གཉིས་ཅན་གྱི་ཚོགས་པ་ཞིག་དང་(Tulane School of Social Work in the United States) ང་ཚོའི་ཚོགས་པའི་སློབ་སྟོན་ལྷན་ཚོགས་ཀྱི་ཚོགས་མི་སྐུ་ཞབས་ནིལ་གྷུ་ཊིར(Neil Guidry) ལགས་ཀྱི་སྣེ་ཁྲིད་པའི་ཚོགས་པ་ཞིག་བཅས་ཚོགས་པ་མི་འདྲ་བ་ཁག་གཉིས་དང་རིག་གཞུང་བརྗེ་རེས་གནང་ཡོད་པ་རེད།
ཚོགས་པ་དེ་གཉིས་རྡ་སར་ལྷ་ཞི་བའི་ཚལ་དུ་(Lha’s Ahimsa House) བདུན་ཕྲག་གཅིག་རིང་གནས་སྡོད་ཀྱིས་ཉེ་འཁོར་དུ་ཡོད་པའི་བཙན་བྱོལ་བོད་མིའི་སྒྲིག་འཛུགས་ཀྱི་ལྷན་ཁང་ཁག་དང་གཞུང་འབྲེལ་མ་ཡིན་པའི་ཚོགས་སྡེ་ཁག་བཅས་ལ་སྐོར་བསྐྱོད་ཀྱིས་བོད་པ་བཙལ་བྱོལ་བའི་གནས་སྟངས་དང་། བོད་ནང་གི་ཆབ་སྲིད་ཀྱི་གནས་སྟངས། བོད་ཀྱི་ཆོས་དང་རིག་གཞུང་སོགས་ཀྱི་ངོ་སྤྲོད་དང་། དེ་བཞིན་ང་ཚོ་ཚོགས་པའི་བོད་པའི་སློབ་ཕྲུག་རྣམས་དང་ལྷན་དུ་ཉེར་ཁོར་དུ་ཡོད་པའི་དགོན་སྡེ་ཁག་དང་སློབ་གྲྭ་ཁག་བཅས་ལ་ལྟ་བསྐོར་དང་། བོད་པའི་སློབ་ཕྲུག་རྣམས་ལ་ཨིན་སྐད་ཀྱི་སྦྱོང་བརྡར་དང་ནུབ་ཕྱོགས་པའི་གནས་སྟངས་ཀྱི་སྐོར་ལ་རྒྱུས་ལོན་ཐུབ་པ་བྱུང་ཡོད། མཐོ་སློབ་ཁང་དེའི་སློབ་ཕྲུག་རྣམས་འདི་གར་བསྡད་ཡུན་རིང་དགོང་དྲོ་ང་ཚོའི་ཨིན་སྐད་ཁ་བརྡ་འཛིན་གྲྭར་མཉམ་ཞུགས་གནང་ཡོད་པ་རེད། དམིགས་བསལ་གྱི་དགའ་སྤོབས་སྐྱེས་འོས་པ་ཞིག་ལ་ཚོགས་པ་དེ་གཉིས་ལ་༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་ཞལ་མཇལ་དང་གསུང་གི་བདུད་རྩི་མྱོང་རྒྱུའི་བསྐལ་བཟང་གི་གོ་སྐབས་ཀྱང་ཐོབ་ཡོད་པ་དང་། 
དེ་བཞིན་ལྷ་ཞི་བའི་ཚལ་ཚོགས་ཁང་དུ་བོད་ཀྱི་དཔེ་མཛོད་ཁང་གི་དབུ་འཛིན་དགེ་བཤེས་ལྷག་རྡོར་ལགས་ཀྱིས་༼བདེ་སྐྱིད་ལྡན་པའི་མི་ཚེ་དང་འཆི་བའི་སྐབས་དྲན་པ་ཉེར་བཞག་གིས་ཕན་ཚུལ།༽ཞེས་པའི་བརྗོད་གཞིོ་ཐོག་གསུང་བཤད་ཀྱང་གནང་ཡོད་པ་རེད།དེར་ཕྱི་རྒྱལ་གྱི་དྭངས་བླང་བ་གཞན་མི་ཉུང་བ་ཡང་མཉམ་ཞུགས་ཀྱི་ཐོག་གསུང་བཤད་གྲུབ་རྗེས་དྲི་བ་དྲིས་ལན་ཡང་གནང་ཡོད། ཚོགས་པ་གཉིས་ཀྱི་ནང་ནས་ཚོགས་པ་གཅིག་གི་ཚོགས་མི་ཚང་མ་རྒྱ་གར་ནང་ཡོད་པའི་བོད་པའི་བཙན་བྱོལ་སྤྱི་ཚོགས་ནང་ཡོང་བ་ཐོག་མ་དེ་ཡིན་པ་དང་། ཁོ་ཚོས་བརྗོད་དོན། ང་ཚོ་དེ་རིང་གི་རིག་གཞུང་བརྗེ་རེས་ཀྱི་གོ་སྐབས་དེ་བརྒྱུད་ནས་མི་ཚེའི་ནང་ཉམས་མྱོང་དང་ཚོར་བ་དམིགས་བསལ་ཞིག་སྐྱེས་སོང་ཞེས་དང་། ཡང་ཚོགས་མི་ཞིག་གིས་གསུང་དོན། ངའི་མི་ཚེའི་ནང་བོད་པ་དང་ཐུག་འཕྲད་བྱེད་པ་ཐོག་མ་དེ་ཡིན། ངས་བསམ་པར་༧རྒྱལ་བ་རིན་པོ་ཆེ་བཙན་བྱོལ་དུ་ཕེབས་ཚར་ནས་བོད་པ་ཡོང་རྒྱུ་ཡང་མཚམས་ཆད་ཚར་བ་རེད་དྲན་བྱུང་། ངས་དངོས་གནས་གང་ཡང་ལབ་ཤེས་མ་སོང་ཡིན་ནའང་འབྱུང་འགྱུར་ངས་བོད་པ་དང་བོད་ཀྱི་རྩ་དོན་ཆེད་གཞོགས་འདེགས་གང་ཐུབ་ཞུ་ཐུབ་པའི་རེ་བ་ཡོད་ཅེས་གསུང་སོང་། མཐའ་དོན་ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་གི་འགན་འཛིན་མཆོག་ནས་ཚོགས་པའི་སྣེ་ཁྲིད་པ་སྐུ་ཞབས་རོན(Dr Ron)ལགས་གཙོས་པའི་ཏུན་ལན་མཐོ་སློབ་(Tulane University )ནས་ཕྱི་ལོ་༢༠༠༢ ནས་བཟུང་ལོ་ལྟར་སློབ་ཕྲུག་ཚོགས་པ་འདི་གར་རིག་གཞུང་བརྗེ་རེས་ཆེད་ཕེབས་པ་དང་ཐོག་མཐའ་བར་གསུམ་དུ་ང་ཚོའི་ཚོགས་པར་རྒྱབ་སྐྱོར་གནང་བར་སྙིང་ཐག་པ་ནས་ཐུགས་རྗེ་ཆེ་ཞུས་ཡོད་པ་རེད།།