རྒྱལ་སྤྱིའི་སློབ་ཕྲུག་ཚོ་ཁག་མི་འདྲ་བ་གསུམ་དང་རིག་གཞུང་བརྗེ་རེས།
༡༽ ཐུ་ལན་སྨན་ཀྱི་སློབ་ཕྲུག་ཚོ་ཁག་ཐེངས་གཉིས་པ།
ཕྱི་ལོ་ ༢༠༡༨ ཟླ་ ༧ པའི་ནང་ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་གིས་རྒྱལ་སྤྱིའི་སློབ་ཕྲུག་ཚོ་ཁག་མི་འདྲ་བ་གསུམ་དང་རིག་གཞུང་བརྗེ་རེས་གནང་ཡོད་ཅིང་།
དེ་ཡང་ཐོག་མར་ཐུ་ལན་(Tulane)སྨན་པའི་སློབ་ཕྲུག་ཚོགས་པ་ཞིག་དང་བདུན་ཕྲག་གཉིས་ཀྱི་རིང་རིག་གཞུང་བརྗེ་རེས་ཀྱི་ལས་འགུལ་དེ་སྐུ་ཞབས་སུ་ཆིན (Dr Suchin) གཙོས་པའི་སྨན་པའི་སློབ་སྦྱོང་བྱེད་བཞིན་པའི་སློབ་ཕྲུག་གྲངས་ ༧ ཅན་གྱི་ཚོ་ཁག་ཞིག་ནས་བཙན་བྱོལ་སྤྱི་ཚོགས་ནང་ཡོད་པའི་རྙིང་དགོན་འཕགས་ཡུལ་ཆོས་འཁོར་གླིང་དང་རྫོང་གསར་བཤད་གྲྭ་གཉིས་ཀྱི་ནང་སློབ་གཉེར་བ་དགེ་འདུན་པ་མང་པོར་རིན་མེད་ཀྱི་ཐོག་ནས་མིག་དང་སོའི་བརྟག་དཔྱད་གནང་བ་བརྒྱུད་དགེ་འདུན་པ་ ༦༠ ཙམ་ཞིག་ལ་དུས་ཐོག་སྨན་བཅོས་བྱེད་ཡོད་པ་རེད། མ་ཟད་འཕགས་ཡུལ་ཆོས་འཁོར་གླིང་དུ་འཕྲོད་བསྟེན་སློབ་གསོའི་ལས་འགུལ་སྤེལ་ནས་ལོ་ལྔ་ཕྱིན་ཟིན་ཡོད་ཅིང་། ཚོ་ཁག་དེའི་སྣེ་ཁྲིད་པ་ཨན་ (Anne) གས་ཀྱི་བརྗོད་དོན་ལྟར་ན་ད་ལོའི་ནད་པའི་གྲངས་ཚད་ནི་ལོ་སྔོན་མ་དག་ལས་ཆེས་ཉུང་བ་ཡིན་པ་འགྲེལ་བརྗོད་ཀྱང་གནང་སོང་།
ང་ཚོའི་རིག་གཞུང་བརྗེ་རེས་ཀྱི་ལས་གཞི་དེ་བརྒྱུད་ནས་ཚོགས་པས་ཕྱི་རྒྱལ་བ་སློབ་ཕྲུག་ཚོར་བཙན་བྱོལ་བོད་མིའི་སྤྱི་ཚོགས་དང་ས་གནས་ཀྱི་རྒྱ་གར་བའི་ཁྲོད་དུ་སྤྱི་ཚོགས་ཞབས་ཞུའི་ལས་འགུལ་སྣ་མང་ནང་ཞུགས་རྒྱུའི་མཐུན་རྐྱེན་སྐྲུན་གྱི་ཡོད་པ་དང་། དེ་བཞིན་ད་ལྟའི་བོད་ཕྱི་ནང་གི་ཆབ་སྲིད་ཀྱི་གནས་སྟངས་སྤྱི་དང་ལྷག་དོན་དུ་བཙན་བྱོལ་བའི་གནས་སྟངས། བོད་ཀྱི་ཆོས་དང་རིག་གཞུང་། ཡུལ་སྲོལ་གོམས་གཤིས་སོགས་ལ་རྒྱུས་ལོན་བྱ་རྒྱུའི་གོ་སྐབས་ཧ་ཅང་མང་པོ་ཡང་བསྐྲུན་ཡོད་པ་རེད།
རིག་གཞུང་བརྗེ་རེས་ཀྱི་ལས་གཞི་འདི་ཉིད་ཇི་ལྟར་འགོ་བཙུགས་པའི་ཚུལ་ནི། ཕྱི་ལོ་༢༠༠༢ ལོ་ནས་ཐུ་ལན་གཙུག་ལག་སློབ་གྲྭ་ (Tulane University) ནས་ཚོགས་པར་རེ་འདུན་བཏོན་པ་ལྟར། ཚོགས་པའི་ངོས་ནས་གཙུག་ལག་སློབ་གྲྭ་དེའི་ཐར་ཕྱིན་སློབ་ཕྲུག་ཚོའི་ཆེད་དྷ་རམ་ས་ལར་སྤྱི་ཚོགས་ཞབས་ཞུ་ལས་དོན་གྱི་སྣེ་ཁྲིད་དང་། རིག་གཞུང་བརྗེ་རེས་ཀྱི་ལས་གཞི་འདི་ཉིད་བརྩམས་ཡོད་པ་དང་། ང་ཚོའི་ཚོགས་པའི་ངོས་ནས་ལོ་ལྟར་སྤྱི་ཚོགས་ཞབས་ཞུའི་ལས་འགུལ་སྣ་མང་སྤེལ་ཐུབ་པ་དང་ཕན་ཐོགས་ཀྱང་རླབས་ཆེན་བྱུང་བས་ལོ་ངོ་དེ་དག་རིང་ལས་གཞི་འདིར་ཁྱེད་རྣམ་པས་འབད་བརྩོན་དང་། རྒྱབ་སྐྱོར། རམ་འདེགས་བཅས་ལ་བརྟེན་ནས་བྱུང་བ་ཡིན་པས། ང་ཚོའི་ཚོགས་པའི་ངོས་ནས་བཅོས་མིན་གྱི་ཐུགས་རྗེ་ཆེ་ཞུ་རྒྱུ་ཡིན།
༢༽ལོ་ཡོ་ལ་མཐོ་སློབ་ཀྱི་སློབ་ཕྲུག་ཚོགས་པ།.
ཕྱི་ལོ་༢༠༡༨ ཟླ་༧ ཚེས་༤ནས་༢༢ བར་ཨ་རིའི་ལོ་ཡོ་ལ་གཙུག་ལག་སློབ་གྲྭ་ (Loyola University) ནས་སྐུ་ཞབས་མལ་ཀལ་སིམིཐ་(Michael Smith ) དང་སྐུ་ཞབས་ཇོན་ཁི་ལིརཀི་ (Dr John Clark) གཉིས་ཀྱིས་སྣེ་ཁྲིད་པའི་སློབ་ཕྲུག་ ༡༡ ཡོད་པའི་ཚོ་ཁག་ཞིག་དང་ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་གི་སློབ་ཕྲུག་གཉིས་ཕན་ཚུན་རིག་གཞུང་བརྗེ་རེས་ཀྱི་ལས་འགུལ་བརྩམས་ཤིང་། ཕྱི་རྒྱལ་བ་སློབ་ཕྲུག་རེ་ལ་བོད་པའི་སློབ་ཕྲུག་རེ་ངོ་སྤྲོད་ཀྱིས་སློབ་ཕྲུག་ཕན་མཚོན་དབར་རིག་གཞུང་བརྗེ་རེས་གནང་བར་བརྒྱུད་བོད་པའི་སློབ་ཕྲུག་ཚོར་ཨིན་སྐད་ཚོན་པའི་ནུབ་ཕྱོགས་པའི་རིག་གཞུང་རྒྱུས་ལོན་བྱ་རྒྱུ་བྱུང་བ་དང་བོད་པའི་སློབ་ཕྲུག་རྣམས་ཀྱིས་ཀྱང་བོད་ཕྱི་ནང་གཉིས་ཀྱི་གནས་སྟངས་དང་བོད་ཀྱི་རིག་གཞུང་སྐོར་ལ་བརྗེ་རེས་ཀྱིས་གོ་རྟོགས་གོང་མཐོར་སྤེལ་ཐུབ་ཡོད། དེ་བཞིན་དྷ་སའི་ཉེ་ཁོར་དང་སྦིར་གཞིས་ཆགས་བཅས་སུ་དགོན་སྡེ་ཁག་དང་སློབ་གྲྭ་ཁག གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྡེ་ཁག་མི་ཉུང་བ་ཞིག་ཏུ་སྐོར་བསྐྱོད་ཀྱི་ངོ་སྤྲོད་དང་རྒྱུས་ལོན་བྱས་ཡོད་རེད།
༣༽ གོསྦིཡོང་ (GoBeyond) སློབ་ཕྲུག་གི་འགྲུལ་བཞུད།
ཕྱི་ལོ་ ༢༠༡༨ ཟླ་ ༦ ཚེས་ ༡༥ ནས་ཟླ་༧ ཚེས་ ༦ བར་བདུན་ཕྲག་གསུམ་གྱི་རིང་གོསྦིཡོང་ (GoBeyond) གི་སློབ་ཕྲུག་འགྲུལ་བཞུད་པ་སློབ་མ་གྲངས་ ༧ ཅན་གྱི་སློབ་ཕྲུག་ཚོ་ཁག་ཞིག་ང་ཚོའི་ཚོགས་པ་དང་རིག་གཞུང་བརྗེ་རེས་ཀྱི་ལས་འགུལ་ནང་མཉམ་ཞུགས་གནང་སྟེ་བརྗེ་རེལས་ཀྱི་ལས་གཞི་གང་ལེགས་བྱུང་ཡོད། སྤྱིར་ང་ཚོའི་ཚོགས་པའི་ངོས་ནས་ལས་གཞི་འདིའི་དམིགས་འབེན་གཙོ་བོ་ནི་བོད་ཕྱི་ནང་གཉིས་ཀྱི་གནས་སྟངས་དང་། བོད་ཀྱི་ཆོས་དང་རིག་གཞུང་མི་ཉམས་གོང་ཕེལ་དང་གོ་རྟོགས་སྤེལ་ཆེད་རྒྱལ་སྤྱིའི་སྡིངས་ཆ་ཁྱོན་ཡོངས་ལ་ཤེས་རྟོགས་ཐུབ་ཐབས་དང་རང་རིགས་སློབ་ཕྲུག་རྣམས་ཀྱི་ཤེས་ཚད་དང་མི་རིགས་འདྲ་མིན་གྱི་སྐད་རིགས་ཡར་རྒྱས་གཏོང་རྒྱུའི་ཆེད་ལོ་རེ་ཕྱི་རྒྱལ་གྱི་སློབ་ཕྲུག་ཚོ་ཁག་མི་འདྲ་བ་བཅུ་ཕྲག་རྒལ་བ་དང་ལྷན་དུ་ངལ་བ་ཁྱད་བསད་ཀྱི་སྤྱི་ཚོགས་ཞབས་ཞུའི་ལས་དོན་སྒྲུབ་མུས་ཡིན། དེ་དག་ནི་རང་རིགས་ཀྱི་སྤྱི་ཚོགས་སྤྱི་དང་བྱེ་བྲག་ཏུ་ཕྱི་རྒྱལ་ཡུལ་གྲུ་ཁག་ནས་ཚོགས་པ་འདྲ་མིན་གྱི་ང་ཚོར་རྒྱབ་སྐྱོར་དང་ཕྱར་བ་གྲུ་འདེགས་གནང་བར་བརྟེན་ནས་བྱུང་བ་ཡིན་པས་ཚོགས་པའི་ངོས་ནས་ཁྱེད་རྣམས་ལ་བཅོས་མིན་གྱི་ཐུགས་རྗེ་ཆེ་ཞུ་རྒྱུ་ཡིན།