ཨ་རིའི་མཐོ་སློབ་ཞིག་གི་སློབ་ཕྲུག་ཚོགས་པ་དང་རིག་གཞུང་བརྗེ་ལེན་གནང་བ།
ཕྱི་ལོ་༢༠༡༨ ཟླ་ ༥ ཚེས་ ༣༡ ནས་ཟླ་ ༦ ཚེས་ ༢༡ བར་བདུན་ཕྲག་གསུམ་གྱི་རིང་སྐུ་ཞབས་མེག་ཀལ་(Micheal)ལགས་ཀྱིས་དབུ་ཁྲིད་པའི་ཨ་རིའི་ཏུང་ལན་མཐོ་སློབ་(Tulane University)ནས་སློབ་པ་མཐར་སོན་གྱི་སློབ་ཕྲུག་གྲངས་བཅུ་དྲུག་ཅན་གྱི་ཚོགས་པ་ཞིག་དང་ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་གི་སློབ་ཕྲུག་དབར་ཕན་ཚུན་རིག་གཞུང་བརྗེ་ལེན་གྱི་ལས་འགུལ་ཞིག་གནང་ཡོད་པ་རེད།ལས་འགུལ་དེར་
གཙོ་བོ་བོད་ཀྱི་ཆོས་དང་རིག་གཞུང་ཡུལ་སྲོལ་གོམས་གཤིས།དེ་བཞིན་བཙན་བྱོལ་ནང་གི་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྡེ་ཁག་གི་གནས་སྟངས་དང་།
ད་ལྟའི་བོད་ནང་གི་ཆབ་སྲིད་ཀྱི་གནས་སྟངས་བཅས་ཀྱི་སྐོར་འགྲེལ་བཤད་དང་ངོ་སྤྲོད་གནང་ཡོད།སྐབས་འདིའི་སློབ་ཕྲུག་ཚོགས་པ་དེར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་མཇལ་བཅར་གྱི་བསྐལ་བཟང་གི་གོ་སྐབས་ཀྱང་ཐོབ་ཡོད་པ་རེད། ཉེ་འཁོར་གྱི་ས་གནས་རང་དུ་ཡོད་པའི་དགོན་སྡེ་ཁག་དང་སློབ་གྲྭ་ཁག། གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྡེ་ཁག་ཙམ་དུ་མ་ཟད།སྦིར་ས་གནས་གཞི་ཆགས་སུ་ཡོད་པའི་དགོན་སྡེ་ཁག་དང་། 
སློབ་གྲྭ་ཁག་ལ་ཡང་བསྐོར་བསྐྱོད་བྱས་ཡོད་པ་རེད།རིག་གཞུང་བརྗེ་ལེན་གྱི་ལས་འགུལ་དེ་བརྒྱུད་ནས་བོད་པའི་སློབ་ཕྲུག་རྣམས་ལ་ཡང་དམིགས་བསལ་གྱི་ཨིན་སྐད་སྦྱོང་རྒྱུའི་གོ་སྐབས་དང་ལྷག་དོན་དུ་རྒྱལ་སྤྱི་དང་ནུབ་ཕྱོགས་པའི་གནས་སྟངས་སྐོར་ལ་ཤེས་བྱ་མི་ཉུང་བ་ཞིག་ཀྱང་ཐོབ་ཡོད་པ་རེད།།