ཤར་ནུབ་ཕྲད་པ་ཞེས་པའི་དྲན་ཤེས་སྨན་གྱི་ཚོགས་ཆེན།
༢༠༡༦ ཟླ་ ༡༠ ཚེས་ ༢༣ ནས་ཚེས་ ༢༥ བར་ཉིན་གསུམ་རིང་ལྷ་ཞི་བའི་ཚལ་ཚོགས་ཁང་དུ་ཤར་ནུབ་འཕྲད་པ་ཞེས་པའི་དྲན་ཤེས་སྨན་གྱི་ཚོགས་ཆེན་ཚོགས་ཤིང་། ཚོགས་འདུ་དེ་ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་དང་། བདེ་ལེགས་སྨན་ཁང་། ནིའུ་ཨོར་ལན་སིའི་ཨོ་ཤ་ནར་སྨན་ཁང་ཁག ལུ་ཛི་ཡ་ན་མི་སི་སི་པིའི་འཕྲོད་བསྟེན་སྒྲིག་འཛུགས། ལུ་ཛི་ཡ་ན་ཧི་མཱ་ལ་ཡའི་ཚོགས་པ་བཅས་ཐུན་མོང་གིས་གོ་སྒྲིག་གནང་བར་མ་ཟད། བོད་ཀྱི་སྨན་རྩིས་ཁང་གི་སྨན་པ་དང་། ས་གནས་རྒྱ་གར་སྨན་པ་སོགས་གདན་ཞུས་ཀྱིས་གོང་གསལ་ཚོགས་སྡེ་དང་སྨན་ཁང་ཁག་ནས་སྨན་པ་གྲངས་ཉི་ཤུ་ལྷག་འདུ་འཛོམས་བྱུང་ཡོད་པ་རེད།
ཚོགས་འདུའི་ཉིན་དང་པོར་བདག་ཉིད་ཆེན་པོ་སློབ་དཔོན་ཟམ་གདོང་རིན་པོ་ཆེ་མཆོག་གིས་སྨན་བཅོས་ལག་ལེན་ཧྲིལ་པོའི་ནང་དྲན་ཤེས་དང་།
ལུས་སེམས་ཀྱི་འབྲེལ་བ་ཞེས་པའི་བརྗོད་གཞིའི་ཐོག་གསུང་བཤད་དང་། བདེ་ལེགས་སྨན་ཁང་གི་སྨན་པ་ཆེ་བ་སྐུའི་བླ་སྨན་ས་འདུ་ཚང་ཚེ་བརྟན་རྡོ་རྗེ་ལགས་ཀྱིས་སྨན་བཅོས་མ་ལག་དང་ལུས་སེམས་ཀྱི་འབྲེལ་བ་ཞེས་པའི་བརྗོད་གཞིའི་ཐོག་ཕྱོགས་ཡོངས་ནས་ནད་བཅོས་ལག་ལེན་བྱེད་ཐབས་སྐོར་གསུང་བཤད་གནང་བ་དང་། དེ་བཞིན་ས་གནས་རྒྱ་གར་གསོ་རིག་མཐོ་སློབ་ཀྱི་སྨན་པ་དང་སློབ་དཔོན་པཱར་ཝན་ཤཱ་མ་སོགས་ཀྱིས་རྒྱ་གར་ནང་གཟེར་འཇོམས་ལྟ་སྐྱོང་གནས་སྟངས་སྐོར་གསུང་བཤད་གནང་བ་རེད།
ཚོགས་འདུའི་ཉིན་གཉིས་པར་སྨན་རྩིས་ཁང་གི་ཞིབ་འཇུག་སྡེ་ཚན་གྱི་སྨན་པ་བསྟན་འཛིན་ཡེ་ཤེས་ལགས་ཀྱིས་སྲོལ་རྒྱུན་བོད་སྨན་སྐོར་གཏམ་བཤད་དང་། ཨ་རི་བ་སྨན་པ་སཱ་རྭ་དང་ཀེ་ཝན། དེ་བཞིན་ཇོན་ན་ཐ་སོགས་ཀྱིས་གློ་ནད་སྐོར་གཏམ་བཤད་གནང་ཞིང་། ཚོགས་འདུའི་ཐོག་བདེ་ལེགས་སྨན་ཁང་གི་སྨན་པ་བསྟན་འཛིན་བདེ་གསལ་ལགས་ཀྱིས་བོད་པའི་སྤྱི་ཚོགས་ནང་ལོ་ན་རྒས་པའི་བརྒྱུད་རིམ་དང་མཐའ་མཇུག་གི་མི་ཚེའི་ནང་ལྟ་སྐྱོང་བྱེད་ཕྱོགས་སྐོར་གཏམ་བཤད། བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས་འཆི་བ་དང་འཆི་བཞིན་པར་ནང་པའི་ལྟ་ཚུལ་སྐོར་གསུང་བཤད་གནང་ཞིང་།ཨ་རིའི་སྨན་པ་ཁི་སི་ཊོ་ཕར་གྱིས་མཆིན་པའི་གཉན་ཚད་སྐོར་གཏམ་བཤད་བྱས། ཚོགས་འདུ་འདི་ལོ་ལྟར་འཚོགས་འཆར་ཡོད་པ་རེད།