རྒྱལ་སྤྱིའི་སྐད་ཡིག་འཛིན་གྲྭའི་ཁེ་ཕན་དང་གྲུབ་འབྲས།
ད་བར་སྐད་ཡིག་འཛིན་གྲྭར་འཛུལ་ཞུགས་གནང་མཁན་མི་གྲངས་ ༡༢༤༥༨ བྱུང་ཡོད་པ་རྣམས་མང་ཆེ་བ་དང་པོ་ཕྱི་རྒྱལ་སྐད་ཡིག་གི་གསལ་བྱེད་ཙམ་ཡང་མི་ཤེས་མཁན་ཤ་སྟག་རེད། རྒྱུ་མཚན་ནི་ང་ཚོའི་སློབ་ཕྲུག་ཕལ་ཆེ་བ་བོད་ནས་གསར་དུ་འབྱོར་བ་གང་ཞིག་ལ། བཙན་བྱོལ་ནང་གི་སློབ་གྲྭ་ཁག་ལ་འཛུལ་ཞུགས་བྱེད་པར་ལོ་ཚད་སོགས་བརྒལ་ཏེ་སློབ་གྲྭར་འགྲོ་རྒྱུའི་གོ་སྐབས་མ་རག་མཁན་དང་། དགོན་པ་ཁག་ནས་ཐོན་པའི་གྲྭ་བཙུན་སོགས་རེད། དེ་དག་མི་རིགས་འདྲ་མིན་ཡོད་པའི་སྤྱི་ཚོགས་ནང་སླེབས་སྐབས་ཕྱི་རྒྱལ་གྱི་སྐད་ཡིག་མི་ཤེས་པས་ཉིན་རེའི་འཚོ་བའི་ནང་འགྲོ་འདུག་སྤྱོད་གསུམ་ལ་ཐད་ཀར་དཀའ་ངལ་ཆེན་པོ་འཕྲད་ཀྱི་ཡོད། ང་ཚོས་ཤེས་རྟོགས་བྱུང་བ་ལྟར་ན་ཐོག་མར་གསལ་བྱེད་མི་ཤེས་མཁན་གྱི་སློབ་ཕྲུག་ཚོས་ཟླ་ཤས་རྗེས་ཟ་སྐད་འཐུང་སྐད་ཤེས་པ་ཆགས་ཏེ་སོ་སོའི་ཉིན་རེའི་འཚོ་བའི་ནང་གི་གལ་ཆེའི་དཀའ་ངལ་ཁག་ཅིག་སེལ་ཐུབ་པ་ཡོང་གི་འདུག དེ་ནས་ལོ་གཉིས་གསུམ་མུ་མཐུད་སྐད་ཡིག་སློབ་སྦྱོང་བྱེད་དུས་སོ་སོ་ངོ་སྤྲོད་བྱེད་ཐུབ་པར་མ་ཟད་མི་གཞན་དང་མཉམ་དུ་ཉམས་མྱོང་བརྗེ་རེས་དང་འབྲེལ་ལམ་གནང་ཐུབ་པ་ཆགས་ཀྱི་འདུག ཁག་ཅིག་སྐད་སྒྱུར་དང་ཡིག་སྒྱུར་ཡང་ཐུབ་པ་བྱུང་སྟེ་ལས་ཀ་བྱེད་མུས་ཡིན། ཨིན་སྐད་ལྟ་བུ་གོ་བརྡ་འཕྲོད་ངེས་ཆགས་ཡོང་དུས་ལས་ཀ་སོགས་རག་པར་གོ་སྐབས་མང་བ་ཡོད་པ་བརྗོད་མ་དགོས་པ་དང་།
ཕྱི་རྒྱལ་ལ་འགྲོ་མཁན་ཚོར་དེས་བས་ཀྱང་ཁེ་ཕན་ཆེན་པོ་ཡོད། དཔེར་ན། ཡོ་རོབ་རྒྱལ་ཁབ་སོགས་སུ་ཕེབས་མཁན་ཚོས་ཧྤ་རན་སི་དང་འཇར་མན་གྱི་སྐད་ཡིག་ཤེས་ཀྱི་ཡོད་ན། ཡུལ་དེར་སླེབས་སྐབས་ཁོང་ཚོའི་འགྲོ་སྟངས་ལྟར་ན་མང་ན་ལོ་གཅིག་དང་ཉུང་ན་ཟླ་བ་དྲུག་ཙམ་རིང་སྐད་ཡིག་སྦྱོང་དགོས་པ་དེར་འགྲོ་མི་དགོས་པར་ཡིག་ཚད་འཕྲོད་ན་ཐད་ཀར་ལས་རིགས་སྦྱོང་བརྡར་བྱེད་སར་འགྲོ་ཆོག་གི་ཡོད་པས། ལས་ཀ་ཡག་པོ་དང་མགྱོགས་པོ་རག་རྒྱུར་ཕན་ཐོགས་ཧ་ཅང་ཆེན་པོ་ཆགས་ཀྱི་ཡོད། 
དེ་བཞིན་ཨིན་སྐད་བེད་སྤྱོད་ཡོད་སའི་རྒྱལ་ཁབ་སོགས་ལ་འགྲོ་མཁན་ཚོས་ཡུལ་དེར་སླེབས་སྐབས་སྐད་ཡིག་གོ་བརྡ་མི་འཕྲོད་པའི་དཀའ་ངལ་མེད་ཅིང་། ལས་ཀའི་གོ་སྐབས་སོགས་རང་བཞིན་གྱིས་མང་བ་ཡོད་པར་མ་ཟད། ཕྱོགས་མཐའ་རུ་འགྲུལ་བཞུད་སྐབས་སྐད་ཡིག་གོ་བརྡ་མི་འཕྲོད་པའི་དཀའ་ངལ་མེད་པ་ཆགས་ཏེ་རང་ཉིད་ལ་རང་དབང་དང་གདེང་ཚོད་ཡོད་པའི་ངང་འགྲོ་སྐྱོད་ཐུབ་ཀྱི་ཡོད་པ་དེས་ཉིན་རེའི་འཚོ་ཐབས་ལ་ཕན་ཐོགས་ངེས་ཅན་བྱུང་ཡོད། རྒྱ་ཡིག་སྦྱོང་མཁན་ལ་མཚོན་ན་རིགས་གཅིག་བོད་ལ་ལོག་རྒྱུའི་དམིགས་ཡུལ་ཡོད་པ་དང་། ཡང་རིགས་གཅིག་ཕྱི་རྒྱལ་ལ་འགྲོ་ཐུབ་ན་ལས་ཀའི་གོ་སྐབས་སོགས་ཡག་པོ་ཡོད་པའི་རྒྱུན་མཚན་ལ་བརྟེན་ནས་ཡིན།
ང་ཚོའི་འཛིན་གྲྭའི་ནང་སྐད་ཡིག་སློབ་སྦྱོང་གནང་རྗེས་བོད་ལ་ལོག་མཁན་མང་པོ་བྱུང་འདུག་པས། ཁོང་ཚོ་མང་ཆེ་བ་བོད་ནང་ཡུལ་སྐོར་བའི་སྐད་སྒྱུར་དང་། སྣེ་ལེན་ཞབས་ཞུ། དགེ་རྒན་སོགས་ཀྱི་ལས་ཀ་བྱེད་བཞིན་ཡོད་འདུག ང་ཚོས་ཤེས་རྟོགས་བྱུང་བ་ལྟར་ན་སྐད་ཡིག་འཛིན་གྲྭའི་སློབ་ཕྲུག་མི་ཉུང་བ་ཞིག་མཐོ་རིམ་སློབ་གྲྭར་སློབ་སྦྱོང་བྱེད་ཐུབ་པ་བྱུང་ཡོད་ཅིང་། ལྷག་པར་ང་ཚོའི་དགེ་རྒན་མང་ཆེ་བ་ཕྱི་རྒྱལ་དྭང་བླངས་བ་ཡིན་པས་སྐད་ཡིག་སྦྱང་ཞོར་ལ་ནུབ་ཕྱོགས་ཀྱི་གོམས་གཤིས་དང་རིག་གཞུང་སོགས་རང་བཞིན་གྱིས་ཤེས་ཀྱི་ཡོད་པ་དེ་ལས་རང་ཉིད་ཀྱི་མི་ཚེའི་འཚོ་བའི་ནང་དགོས་མཁོ་ཡོད་པའི་ལེགས་ཆ་མང་པོ་ལེན་རྒྱུ་ཡོད་པ་སྨོས་ག་ལ་དགོས།
ཉེ་བའི་ལོ་ཤས་ནས་བཟུང་མཐོ་སློབ་ཏུ་འགྲོ་མཁན་སློབ་ཕྲུག་མང་པོ་ཞིག་ང་ཚོའི་སྐད་ཡིག་འཛིན་གྲྭར་ཕྱི་རྒྱལ་སྐད་ཡིག་ཡར་རྒྱས་གཏོང་ཆེད་ཡོང་གི་ཡོད་པས་སློབ་ཕྲུག་དེ་དག་ཕྱི་རྒྱལ་བ་རང་དང་མཉམ་དུ་ཕྱི་རྒྱལ་གྱི་སྐད་ཐོག་ནས་སྐད་ཆ་བཤད་རྒྱུའི་གོ་སྐབས་རག་སྟེ། སྒྲ་གདངས་དང་། སྐད་ཆ་ཤོད་སྟངས་ཡར་རྒྱས་འགྲོ་བར་ཕན་ཐོགས་ཆེན་པོ་ཡོད་པ་འགྲེལ་བརྗོད་གནང་གི་འདུག བོད་ཡིག་སྦྱོང་མཁན་ལ་ཆ་མཚོན་ན་དང་པོ་ཀ་ཁ་མི་ཤེས་མཁན་ནས་མཐར་འབྲི་ཀློག་ཤེས་པ་ཆགས་ཏེ་ཁ་འདོན་དཔེ་ཆ་ཀློག་ཐུབ་པར་མ་ཚད་ཉིན་ཐོ་སོགས་འབྲི་ཤེས་པ་ཡང་ཆགས་ཡོད།
མདོར་ན་ང་ཚོས་སྐད་ཡིག་འདྲ་མིན་སློབ་ཁྲིད་བྱས་པ་ལ་བརྟེན་ནས་མི་མང་པོ་ཞིག་གི་འཕྲལ་ཕུགས་རྒྱང་གསུམ་གྱི་འཚོ་གནས་ཀྱི་དཀའ་ངལ་ཆེན་པོ་ཞིག་སེལ་ཐུབ་པ་དེ་ནི་ང་ཚོས་འགྲུབ་འབྲས་ཆེན་པོ་ཞིག་ཐོན་པར་ངོས་འཛིན་བྱེད་ཀྱི་ཡོད། རྒྱུ་མཚན་ནི་རོགས་རམ་དགོས་ངེས་ཅན་གྱི་མི་མང་པོར་མི་ཚེའི་འཚོ་གནས་ཡར་རྒྱས་དང་བཟང་ཕྱོགས་ཀྱི་འགྱུར་ལྡོག་ཆེན་པོ་ཞིག་བཏང་ཐུབ་ཡོད་པས་རེད་ལ། ཁོང་ཚོ་སྐད་ཡིག་སྦྱོང་དགོས་པའི་དམིགས་ཡུལ་ཡང་དེ་རང་ལས་མ་འདས།