ཀམ་པུ་ཊར་འཛིན་གྲྭ།
ང་ཚོའི་ཀམ་པུ་ཊར་འཛིན་གྲྭ་ནི་ཚོགས་པ་གསར་འཛུགས་སྐབས་ཀྱི་ལས་གཞི་ཞིག་ཡིན། དེ་ཡང་དུས་རབས་ཉེར་གཅིག་པ་འདི་བརྡ་འཕྲིན་དུས་རབས་ལ་ངོས་འཛིན་བྱེད་བཞིན་ཡོད་པས། བཙན་བྱོལ་བོད་མི་ཚོ་དུས་རབས་ཀྱི་རྗེས་ཟིན་པ་ཞིག་འགྲོ་དགོས་ན་ཀམ་པུ་ཊར་གྱི་སློབ་ཚན་ནི་མེད་དུ་མི་རུང་བ་ཆགས་ཡོད་པ་རེད། དེ་བཞིན་ལས་ཀའི་གོ་སྐབས་དང་ཉིན་རེའི་འཚོ་བའི་དགོས་མཁོ་ལ་གཞིགས་ཏེ་ཀམ་པུ་ཊར་སློབ་སྦྱོང་ནི་དགོས་མཁོ་ཧ་ཅང་ཆེན་པོ་ཡིན་པའི་རྒྱུ་མཚན་ལ་བརྟེན་ནས་སྐབས་དེར་ཀམ་པུ་ཊར་འགའ་ཤས་ལས་མེད་ཀྱང་། དེ་དག་དོན་དང་ལྡན་པའི་བེད་སྤྱོད་ཀྱིས་ཐུགས་སྣང་ཅན་མང་པོར་ཉིན་ལྟར་སློབ་ཚན་འཁྲིད་ཀྱི་ཡོད།
ཕྱི་ལོ་ ༢༠༠༨ ལོར་ཀམ་པུ་ཊར་བཅུ་ཙམ་གསར་ཉོས་ཀྱིས་འཛིན་གྲྭ་ཁག་ཡར་རྒྱས་བཏང་སྟེ། ཀམ་པུ་ཊར་འཛིན་གྲྭ་ནང་ཀམ་པུ་ཊར་རྨང་གཞིའི་ཤེས་བྱ་ངོ་སྤྲོད་ཀྱིས། དེ་ནས་མཛུབ་གནོན་ལྕགས་པར་དང་། སྐར་ཁུང་མཉེན་ཆས་ཀྱི་བྱེད་ལས། བེད་སྤྱོད་གཏོང་སྟངས། དེའི་ཐོག་ལས་ཀ་བྱེད་སྟངས་སོགས་སློབ་ཁྲིད་བྱེད་ཀྱི་ཡོད། ཀམ་པུ་ཊར་གྱི་མཁྲེགས་ཆས་ཁག་ངོ་སྤྲོད་དང་དེའི་བྱེད་ལས། དེ་ནས་མཐོ་རིམ་འཛིན་གྲྭར་པར་བཟོ་སྒྲིག་བྱེད་སའི་མཉེན་ཆས་ (Photoshop) ངོ་སྤྲོད་ཀྱིས་པར་དང་། དེབ། ཡིག་ཆ་རིགས་མཛེས་ཆ་ཇུས་འགོད (Indesign) སོགས་སློབ་ཁྲིད་བཅས་རྩ་བའི་སྡེ་ཚན་གཉིས་སུ་ཕྱེས་ཡོད་ཅིང་། ད་དུང་ང་ཚོས་ཁྱད་ལས་དྭང་བླངས་བ་ཡོད་སྐབས་སུ་ཀམ་པུ་ཊའི་ཆེས་མཐོའི་ཤེས་བྱ་དང་། དྲ་ལམ་བདེ་འཇགས། དྲ་ཚིགས་སྐོར་དམིགས་བསལ་གྱི་སྦྱོང་བརྡར་ཡང་གོ་སྒྲིག་གིས། དཔེར་ན། དྲ་ཚིགས་ཇུས་འགོད་དང་། གསར་བཟོ། དོ་དམ་སོགས་གྱི་ཟབ་སྦྱོང་སྤྲོད་ཀྱི་ཡོད། ད་བར་ཐུགས་སྣང་ཅན་མི་གྲངས་ ༢༩༥༥ ལ་ཀམ་པུ་ཊར་སློབ་ཁྲིད་བྱས་ཡོད་ཅིང་། ཉིན་ལྟར་རྨང་གཞིའི་འཛིན་གྲྭ་གཉིས་དང་མཐོ་རིམ་འཛིན་གྲྭ་གཅིག་བཅས་འཛིན་གྲྭ་གསུམ་ཚོགས་ཏེ། ཉིན་རེར་སློབ་ཕྲུག་ ༡༥ ནས་ ༢༠ ཙམ་ལ་སློབ་ཁྲིད་ཀྱི་དུས་ཡུན་ཟླ་བ་གཅིག་ཡིན། དེ་བཞིན་སློབ་ཕྲུག་གྲངས་ ༢༣༠ ཙམ་ལ་རིན་མེད་ཀམ་པུ་ཊར་སློབ་སྦྱོང་གི་གོ་སྐབས་རག་ཡོད་པར་མ་ཟད། བོད་པའི་གཞུང་འབྲེལ་མ་ཡིན་པའི་ཚོགས་སྡེ་འགའ་ཤས་ཀྱི་ལས་བྱེད་ལ་ཡང་རིན་མེད་སྦྱོང་བརྡར་གྱི་གོ་སྐབས་ཕུལ་ཡོད། དྲ་ཚིགས་གསར་བཟོ་དང་དོ་དམ་གྱི་སྦྱོང་བརྡར་ཐེངས་ ༡༢ ཙམ་གོ་སྒྲིག་གིས་འབྲེལ་ཡོད་ཚོགས་སྡེ་ཁག་གི་ལས་བྱེད་དང་སློབ་ཕྲུག་གྲངས་ ༡༢༧ ཙམ་ལ་ཕན་ཐོགས་གང་ལེགས་བྱུང་ཡོད། ཕྱི་ལོ་ ༢༠༠༩ དང་ ༢༠༡༠ སོ་སོར་ཐའེ་ཝན་གྱི་གཙུག་ལག་སློབ་གྲྭ་ཞིག་གི་ཀམ་པུ་ཊར་སྡེ་ཚན་དང་མཉམ་འབྲེལ་གྱིས་སློབ་ཕྲུག་མང་པོར་རིན་མེད་ཀམ་པུ་ཊར་གྱི་རྨང་གཞིའི་སྦྱོང་བརྡར་སྤྲད་ཡོད་པ་རེད།
ཀམ་པུ་ཊར་སྦྱོང་མཁན་མང་ཆེ་བ་སྔོན་ཆད་སྦྱོང་མྱོང་མེད་མཁན་ཡིན་ཞིང་། དེ་ཡང་ཀམ་པུ་ཊར་སྒོ་ཕྱེ་སྟངས་དང་མཛུབ་གནོན་བེད་སྤྱོད་ཀྱི་ཡིག་ཆ་ནང་འཇུག་དང་ཉར་ཚགས་བྱེད་སྟངས་ནས་འགོ་འཛུགས་ཀྱིས་སློབ་ཁྲིད་བྱེད་ཀྱི་ཡོད་པས། དུས་ཡུན་ཟླ་བ་གཅིག་རིང་ཀམ་པུ་ཊར་གྱི་རྨང་གཞིའི་ཤེས་བྱར་ཤེས་རྟོགས་ཡོང་གི་ཡོད་པར་མ་ཟད། དྲ་ལམ་བེད་སྤྱོད་གཏོང་སྟངས་དང་། མྱུར་འཕྲིན་ཁ་བྱང་གསར་བཟོ་དང་དེའི་ཐོག་ནས་འབྲེལ་ལམ་བྱེད་སྟངས། སྤྱི་ཚོགས་འབྲེལ་མཐུད་དྲ་ལམ་བེད་སྤྱོད་གཏོང་སྟངས། དྲ་ལམ་ནས་གསར་འགྱུར་དང་འབྲེལ་ཡོད་ཤེས་བྱ་འཚོལ་ཞིབ་བྱེད་སྟངས་སོགས་ཤེས་ཏེ་སློབ་ཕྲུག་མང་པོའི་ལྟ་རྒྱ་དང་མཐོང་རྒྱ་ཆེ་རུ་སོང་ནས་བློ་སྐྱེད་ཆེན་པོ་རག་ཡོད། མཐོ་རིམ་འཛིན་གྲྭ་ལ་ཆ་མཚོན་ན་དེབ་དང་དྲིལ་བསྒྲགས་ཀྱི་ཡིག་ཆའི་རིགས་མཛེས་ཆ་བྱུས་འགོད་དང་། དྲ་ཚིགས་གསར་བཟོ་དང་དོ་དམ་བྱེད་སྟངས་སོགས་སློབ་ཁྲིད་བྱས་པར་བརྟེན་ནས། སློབ་ཕྲུག་མང་པོ་ཞིག་དེབ་དང་ཡིག་ཆའི་རིགས་རང་རྐྱ་འཕེལ་བའི་བྱུས་འགོད་བྱེད་ཐུབ་མཁན་ཆགས་ཡོད་ཅིང་།
དྲ་ཚིགས་གསར་བཟོ་དང་དོ་དམ་བྱེད་མཁན་གྱི་ཁྱད་ལས་པ་ཆགས་ཏེ། ང་ཚོའི་སྤྱི་ཚོགས་ནང་ཀམ་པུར་ཊར་གྱི་སློབ་ཁྲིད་དང་དྲ་ཚིགས་འཆར་འགོད་དང་དོ་དམ་བྱེད་ཐུབ་མཁན་མི་ཉུང་བ་ཞིག་སྐྱེས་སྲིང་བྱེད་ཐུབ་པ་བྱུང་ཡོད། ཚོགས་པར་ཀམ་པུ་ཊར་སྦྱངས་པར་བརྟེན་ནས་སྤྱི་ཚོགས་ནང་ལས་ཀ་རག་ལས་སླ་པོ་དང་གོ་སྐབས་མང་བ་སོགས་ཀྱི་ཕན་ཐོགས་བྱུང་ཡོད་པར་མ་ཟད། བོད་པའི་སྤྱི་ཚོགས་ནང་དྲ་ཚིགས་གསར་བཟོའི་ཁྱད་ལས་པ་མིན་ཉུང་བ་ཞིག་དང་ཕྱི་རྒྱལ་གྱི་ཁྱད་ལས་པའི་དབར་ཕན་ཚུན་ངོ་སྤྲོད་དང་མཉམ་ལས་ཀྱིས་སོ་སོར་དྲ་ཚིགས་གསར་བཟོ་དོ་དམ་ཐོག་ལག་རྩལ་ཡར་རྒྱས་འགྲོ་བར་ཕན་ཐོགས་བྱུང་ཡོད་པ་རེད།