རྒྱབ་ལྗོངས།
༄༅།། ཕྱི་ལོ་ ༡༩༥༩ ལོར་རྒྱ་ནག་གཞུང་གིས་བོད་ས་ཡོངས་རྫོགས་བཙན་བཟུང་བྱས་རྗེས། བོད་ཀྱི་ཆོས་སྲིད་གཉིས་ཀྱི་དབུ་ཁྲིད་༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་དབུས་པའི་བོད་ཀྱི་བླ་སྤྲུལ་དང་གཞུང་གི་དཔོན་རིགས་སོགས་སེར་སྐྱ་མི་མང་འབུམ་ལ་ཉེ་བ་བཙན་བྱོལ་ལ་ཕེབས་དགོས་ཐུག་ཡོད་པ་དང་། བཙན་བྱོལ་ལ་འབྱོར་རྗེས་༸གོང་ས་མཆོག་གི་དབུ་ཁྲིད་ལམ་སྟོན་འོག་བཙན་བྱོལ་བོད་གཞུང་བསྐྱར་དུ་གསར་འཛུགས་དང་འབྲེལ།
རིམ་བཞིན་དགོན་སྡེ་གྲྭ་ཚང་དང་སློབ་གྲྭ་སོགས་གསར་འཛུགས་ཀྱིས་བོད་རྒྱལ་ཁབ་དང་མི་རིགས་འདི་ཉིད་མུ་མཐུད་གནས་ཆེད་བོད་ཀྱི་སྐད་ཡིག་དང་། བོད་བརྒྱུད་ནང་བསྟན། རིག་གཞུང་སོགས་མི་ཉམས་རྒྱུན་འཛིན་གྱིས་བོད་ཕྲུག་བློ་གསལ་གཞོན་ནུ་རྣམས་ལ་གནའ་དེང་གཉིས་ཀྱི་ཤེས་ཡོན་སློབ་སྦྱོང་སྤྲོད་རྒྱུའི་ལས་གཞི་འགོ་འཛུགས་བྱས་ཡོད། དེ་ནས་རིམ་བཞིན་བཙན་བྱོལ་ནང་བསམ་ཤེས་དང་འགན་ཁུར་ལྡན་པའི་མི་སྒེར་སོགས་ཀྱིས་སྤྱི་ཚོགས་ཀྱི་དགོས་མཁོའི་ཆེད་གཞུང་འབྲེལ་མ་ཡིན་པའི་ཚོགས་པ་དང་སྡེ་ཚན་མང་པོ་གསར་འཛུགས་ཀྱིས། ཚོགས་པ་སོ་སོའི་དགོས་དམིགས་དང་གནས་བབས་ལ་གཞིགས་པའི་ལས་དོན་ཆེ་ཕྲ་མང་པོ་ལག་བསྟར་བྱས་དང་བྱེད་མུས་ཡིན་པ་ལྟར་ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་ཡང་སྤྱི་ཚོགས་ཀྱི་དགོས་མཁོའི་ཆེད་གསར་འཛུགས་བྱས་པ་དང་། ཚོགས་པ་འདིས་ཤེས་ཡོན་དང་སྤྱི་ཚོགས་ཞབས་ཞུའི་སྐོར་ལས་དོན་སྣ་མང་བྱེད་བཞིན་པ་རེད།
